Akileraarutinik qaffaanissaq siunnersuutinut immaqa ilaassaaq

Aningaasanut inatsisissami, Aningaasaqarnermut Nunanullu allanut Naalakkersuisup, Aleqa Hammondip, ullumi saqqummiussaani, aningaasaqarnerup 100 millioni koruuninik aappaagu pitsanngoriarnissaa anguniagaavoq. Tamanna qanoq ililluni anguneqassanersoq aalajangerneqanngilaq, periarfissalli pingasuupput: Akileraarutissat procentiat qaffanneqarsinnaavoq, akitsuutit aqqutigalugit aningaasanik pissarsisoqarsinnaavoq, imaluunniit sipaartoqarneratigut aningaasat pissarsiarineqarsinnaapput – taakkuli tamaasa aamma ataatsimoortillugit atorneqarsinnaapput.

-Missingersuutit pillugit partiinik isumaqatigiinniarnissaq Naalakkersuisut apeqqutaatittorujussuussavaat, aningaasanullu inatsisissaq pillugu isumaqatigiilluartoqarnissaa kissaatigaarput, Naalakkersuisunut ilasortaq Aleqa Hammond oqarpoq.

Aningaasaqarnerup 100 millioni koruuninik aappaagu pitsanngoriarnissaa anguniagaagaluartoq, naalakkersuisut missingersuusiaat malillugu 2008-mi nunatta karsia 295 millioni koruuninik amigartooruteqassaaq. Ukiunili tulliini pingasuni 2009-mit 2011-mut agguaqatigiissillugu 134 millioni koruuninik sinneqartooruteqarnissaq missingersuusiarineqarpoq.

Ilinniartitaanerup aamma meeqqat utoqqaallu aappaagu nunatta karsianit aningaasaliiffigineqarnerunissaat amigartoornissamut pissutaanerpaapput. Apeqqutaalerporlu isertitat amerlineqassanersut imaluunniit sipaarniuteqartoqassanersoq.