Akileraartartut paatsuungatinneqarput
Akileraartarnermut aaqqissuussineq nutaaq ukioq-mannamiit aallartittumik atuutilersoq, aallartinnerliorpoq, inuillu akileraartarnermut allagartanik pisimanngitsut, akissarsilerunik allatut ajornartumik ilanngaatitaqanngitsumik akileraartariaqassapput. Ukiup 2006-ip naanissaanut illoqarfiit tamarmik immikkut akileraartarnermut allaffeqarsimagaluartut, ukiup nutaap aallartinnerani immikkoortortaqarfimmik ataasiinnarmik peqalerpoq. Taannalu ajornartorsiutitaqarluni aallartippoq. Maniitsup kommuneani fuldmægtigitut atorfilik, Birthe Skifte, akileraartarnermut aaqqissuussinerup nutaap aallartinnerliornera malugilaavissimanerarpaa.
- Skattesysteemeerutsitaanikuuvugut maani kommunemi, iseriaannaajunnaarlutalu. Aamma immikkoortortaqarfiit nutaat attaviginiarneri ajornalaarput, aamma taakkua suli systeminissimannginnamik. Sisimiunili regionschefi attaveqarfigalugu nammineq inunnik ilisimannissusera aallaavigalugu inuusuttuaqqat frikortinik agguaavunga. Birthe Skifte oqarpoq nangillunilu: - Aqagu akissarsisussat akileraarnermut allagartamik pisinnaanngitsut, akissarsilerunik inatsisillu malinneqassappata, allatut ajornartumik tamakkiisumik akileraartariaqassapput. Innuttaasut taamatut eqqugaasussat soorunami taamaattoqarnera nuannarinngilaat, taamatullu pisoqarnera uagutsinnut sulisuusunut tunnerliorpoq. Ajornartorsiutit aaqqinneqassappata systemilersuisoqartariaqarpoq.
Maniitsup kommuneani fuldmægtigitut atorfilik Birthe Skifte taama oqarpoq.
Akileraartarnermut pisortaqarfiup aaqqissuussineq nutaaq akisussaaffigaa, pisortaqarfillu oqarpoq ajornartorsiutaasut ilisimalluaritik aaqqinniarsarineqartullu, ilaatigut video atorlugu ataatsimiinnerit ingalannerisigut.
