Akileraartarnerup annikillinissaa anguniagaavoq
Akileraartarnerit, soraarnerussutisiassat, inunnik isumaginninneq ineqarnerlu aaqqissuuteqqinneqarniarput, soorlu aamma suliffeqarfeqarneq aaqqissuuteqqinneqarniartoq, ilinniartitaanerlu iliuuseqarfiginiarneqartoq.
Akileraartarnermik allanngortitsineq inuiaqatigiit atugarissasartut aningaasalersorneqarnerannut ineriartortinneqarnerannullu 2025-mi iluaqutaassaaq:
- Akileraartarnermillu allanngortitsinerup sunniutissaa pingaarnerpaaq tassaavoq taanna iluarsaaqqinnermut allanut ilanngukkaanni 2025-mi inuiaqatigiit atugarissaarfigisavut aningaasalersussallugit ineriartortissallugillu akissaqarnissatsinnut iluaqutaassagami, aningaasaqarnermut naalakkersuisoq Maliina Abelsen allappoq.
Akileraartarnermik allanngortitsinerup inuuniarnermut tunngatillugu oqimaaqatigiissagaanissaa, naapertuilluartumillu akileraartaaseqalissasugut, naalakkersuisut aamma oqaatigaat.
- Maannakkorpiaq akileraartarnermik allanngortitsineq isumaqarpoq sulinermik inuussutissarsiutillit amerlanerpaartaasa malugissammassuk akileraarutissat akilerneqareeraangata aningaasarsiaqarnerulernertik. Naalakkersuisut pingaartippaat akileraartarnermik allanngortitsinerup inuuniarnermut tunngatillugu oqimaaqatigiissagaanissaa aamma naapertuilluartumik akileraartaaseqalissasugut, tassani aammattaaq sulinngikkaluarluni isertitat akileraarusersugaassallutik. Sulinikkut akileraarutit annikillisinneqarnerannut aningaasaliissutissat taamaammat nassaarineqassapput, aningaasaqarnermut naalakkersuisoq Maliina Abelsen oqarpoq.
Utaaqqiisaasumik inigisat akileraaruserneqartalernissaat siunniunneqarpoq, inuuniarnermullu tunngatillugu equngasunik tapiissutaasartut ullumikkut akileraarnitsinnut ilaasut aamma killilerniarneqarlutik.
Tamanut ammasumik tusarniaanermi akissutit tunngavigalugit siunnersuut inatsisartut ukiaru ataatsimiinnissaanni saqqummiunneqarumaarpoq.