Akileraartarnermut pisortaqarfik utaqqimaarpoq
Attartortumit piginnittumut aaqqissuussinermut atatillugu, naak akileraartarnermut inatsisip Inatsisartunit aalajangersarneqartup erseqqissumik isertitat tamakkiisut akileraaruserneqartussatut aalajangersaraluarai, akileraartarnermut pisortaqarfiup eqqartuussissuserisup naalagaaffimmik sullissisartup misissuiniarnera utaqqimaaqqaarniarpaa.
Allattoq Jokum Nielsen
Aningaasaqarnermut naalakkersuisoqarfimmi pisortaaneq Peter Schultz radioaviisimut oqarpoq, naalakkersuisut eqqartuussissuserisup naalagaaffimmik sullissisartup naliliinissaa utaqqimaaqqaarniaraat. Pisortaaneq naapertorlugu pisoq politikkimut tunngassuteqarpoq, taamaattumillu oqaaseqarfigisinnaannginnerarlugu, kisiannili aningaasaqarnermut naalakkersuisumut Aleqa Hammondimut innersuussilluni. Taannali pissarsiariniaraluaratsigu ajoraluartumik iluatsinngilarput.