Akileraartarnermut pisortaq: Isornartorsiorneqarnerput tunngavissaqanngilaq

Sulisitsisut Peqatigiiffiannit akileraarutit nalunaarsorneqartarsimannginnerat isornartorsiuinermi tunngavigineqarpoq.

Akileraartarnermi Aqutsisoqarfiup sulisitsisut sulisumik akileraarutaat A-t akilerneqareeraangata tamakkiisumik nalunaarsuisarsimannginnera Qaqortumi Regsnskabsservicemi kukkunersiuisup Bent Sand-ip naammattoortareerpaa, taassumalu suliffeqarfiit illoqarfinni sisamaneersut kukkunersiuuttarpai:

- Sulisitsisut sulisumik akileraarutaat A-t 2007-mi kiisalu 2008-mi akilereersimagaluaraat Akileraartarnermi Aqutsisoqarfimmiup akiliisitsinniartarfianit akileeqqusissutinik allagarsisut misilittagaqarfigaara. Tassa Akileraartarnermi Aqutsisoqarfimmit akileeqqusissutinik allagarsigaangatta taava takussutissanik saqqummiussaqartariaqartarpugut, Bent Sand oqarpoq.

Akileraartarnermi Aqutsisoqarfimmi pisortap Claus S. Jensenip sulisitsisut sulisumik akileraarutaannik A-nik akiliigaangata nalunaarsuisarsimannginneragaallutik isornartorsiorneqarnertik tunngavissaqannginnerarpaa.

- Isornartorsiuinerit akuerinngilakka, Tassami atorfiit arfinillit pillugit immikkut aningaasaliissutissanik qinnuteqarnitsinnut atatillugu tunngavilersuigatta, akileraarutit akilerneqarsimasut nalunaarsorneqartarneri suliarinngitsoorneqartarsimanersut misissoqqaarpavut.

Akileraartarnermi aqutsisoqarfimmut ataavartumik akileraarutinik akiliisoqartarpoq, taakkualu tamatigut nalunaarsorlugit allattarpavut. taamatullu nalunaarsuinermik sulinerit kinguaattooqqalaartuaannartussaapput, tamannalu annerusumik isornartorsiorneqarsinnaanngilaq. Akileraartarnermi Aqutsisoqarfimmi pisortaq Claus S. Jensen oqarpoq.

Aningaasaqarnermut nunanullu allanut naalakkersuisoq, Per Berthelsen, oqarpoq, akileraarutit akilerneqarsimanersut imaluunnit akilerneqarsimannginnersut pillugit pisortat uppernarsaasinnaanngitsut.

- Taamaattumik suliaq misissulerparput, maannakkullu akiitsorineqartut isaatinneqaleruttorput, Per Berthelsen oqarpoq.