Akileraartarnermut ministeri ajornartorsiulersoq
Danskit akileraartarnermut ministeriat, Kristian Jensen (V), ajornartorsiulerpoq, Royal Greenlandip direktøriata tunuaqqammersup Keld Askærip, Fynip Kujataani illuminut atatillugu akileraartarnermut tunngasumik suliassami ajugaareersorlu.
Akileraartarnermut ministereqarfiup direktøriusimasoq Vestre Landsret-imut tunniussimavaa, eqqartuussivik uppernarsaatinniarlugu illup tuninerani Askær akileraarutinik akiliisariaqartoq.
Direktøri nunatsinni Danmarkimilu ataatsikkut sulisimavoq nunanilu taakkunani marlunni illoqarluni – taamaattorli inuit allattorsimaffianni Nuummi nalunaarsimalluni.
Nunatta Eqqartuussiviata ministeeriaqarfik ilumoornerarlugu aalajangiisimavoq, kisianni Askærip suliassaq eqqartuussiviit qullersaannut ingerlateqqimmagu, ministeeriaqarfiup suliassaq unitsippaa Nunattalu Eqqartuussiviata aalajangiinera atorunnaarsillugu.
Taamatut allanngortitseriataarneq isumaqarpoq, ilaatigut folketingimi ilaasortat sapaatip akunnerisalu naanerini uteqattaartartut tunisaqarnerminni akileraarutitigut iluanaaruteqarsinnaalernerat.
Taamatut iluatsitsisinnaasut ilagaat akileraartarnermut ministeri Kristian Jensen (V) nammineq, kisianni nutaarsiassaqartitsivimmut Ritzauimut allappoq suliassamut nammineq akuliussimanani.
