Akileraarnermut ilisimatuup illusisut akileraannginnerat ileqimisaartuutigaa
- Illut nalinginnaasumik tuniniarneqarsimasuuppata akigitinneqartussat nalingat, ilaatigut pingasorarterutaannangorlugu, pisortat illuutaannik pisisimasut taakkua aqqanillit, pisineranni akigitinneqarsimanerat aallaavigalugu iluanaarutaat, nalinginnarmik katersukkatut nalilerlugu tamatigut akileraaruserneqartartussaasoq – aamma Kalaallit Nunaanni akileraartarnermut inatsisit naapertorlugit. Taamatullu Ole Bjørnip naliliinera, naluneqanngitsutut NUNA advokatit, arlaannaannulluunnit attuumassuteqanngitsutut misissuinerminni naliliinerannut naapertuuppoq.
NUNA advokatit akileraartarnermullu immikkut ilisimasallit taamatut naliliigaluartut, Kalaallit Nunaanni akileraartarnermut pisortat akerlerluinnaanik isumaqarput. Taamatullu pisortat isummernerat akileraartarneq pillugu immikkut ilisimasallip ileqimisaartuutigaa, isumaqarnerarlunilu politikkikkut tatisimanninnermik tamanna pissuteqartoq.
Ole Bjørnilli aamma oqaatigaa, Naalakkersuisut unnerluusserusunngippata, akileraartarnermullu pisortat tamatumunnga tapersiiginnarpata, taava allanik unnerluussisinnaasoqanngitsoq. Illusisimasullu akileraartinneqaratik iluanaarutiminnik tigumminniinnarsinnaanerat Naalakkersuisut isaanni ajornartoqartinneqanngippat, pisimasullu tamaannga killeqartutut puigorneqaannassappata, taava taamaattariaqassaaq. Kisiannili taamatut pissuseqarnermikkut Namminersornerullutik Oqartussat uppernassusaat tatigineqarsinnaanerallu annertuumik innarlerneqassaaq, Kalaallillu Nunaanni inuiaqatigiit ingerlanneqarneranni allaffissornikut kanngusuutissanngussalluni, Ole Bjørn oqarpoq.
