Akileraajaarnerusalersinnapput

Nunatsinni avataaniit suliartortunut akileraartarnikkut malittarisassat sukateriffigineqartariaqarput. Naalakkersuisut taama isumaqarput siunnersuutigalugulu nunatsinni avataaneersunut maannakkut ulluni 60-ini akileraannginnissamik malittarisassaq ullunut 14-iinnartut atuuttussanngorlugu allanngortinneqassasoq. Tamatuma kinguneranik avataaniit suliartortut, ullut 14-it sinnerlugit Nunatsinniikkunik maanga akileraartalissapput. Siunnersuut ullumikkut marlunngornermi Inatsisartuni siullermeerlugu oqaluuserineqarpoq.

- Ullunut 14-inut malittarisassaqalernikkut, maannakkut malittarisassat atuuttut atornerlunneqartarnerat pinngitsoortinniarneqarpoq. Tamatuma saniatigut ullunut 14-inut malittarisassaqalernikkut kalaallit qallunaallu suliffeqarfiutaasa assigiinnerusumik unammilleqatigiissinnaanerat periarfissaqalissaaq, taama oqarpoq aningaasaqarnermut nunanullu allanut naalakkersuisoq Josef Motzfeldt.

Siunnersuut Inatsisartuni tapersersorneqarluarpoq. Johan Lund Olsenip ilaatigut oqaatigaa kalaallit suliffeqarfiutaasa unammillernikkut nunani allamiut suliffeqarfiutaannit ajornerusumik atugassaqartitaannginnissaat pingaaruteqartoq.

Emilie Olsenip Atassummeersup erseqqissarpaa, ullunut 14-inut malittarisassaqalernikkut Landskarsi 3 millioni koruuninik isertitaqarnerusalissasoq taamaattumillu Atassutip siunnersuut tapersersoraa.