Akikilliliinissamut ikippallaarput
Tassa internettersinnaalernissamut periarfissat imaaginnavipput. Attaviilli akisoqaat, Atassummeersut Knud Kristiansenip Siverth K. Heilmannillu paragraf 37 naapertorlugu apeqquteqaataannut Naalakkersuisunut ilaasortaq Jens B. Frederiksen taama akissuteqarpoq.
Nunatsinni inukitsumi siammarsimaqisumilu internettimut attaveqarniarnerup unamminartuunera Jens B. Frederiksenip ilanngullugu erseqqissarpaa.
- Taamaattumik interneteqarnermi sanaartornermut aningaasartuuterpassuit atuisunit ikittuinnarnit akilerneqartussaapput. Tamatuma kingunerisaanik Kalaallit Nunaanni internetimik atuinermi akiusut nunanit, soorlu Danmarkimit, atuisoqarnikkut amerlanerusunik tunngavissaqartunit qaffasinnerupput, Jens B. Frederiksen allappoq.
Inoqutigiit nunatsinni 30.000-iusut 42 procentiisa missaat angerlarsimaffimminni internetsimut ullumikkut attaveqarput. Tamatuma saniatigut amerlasuut suliffimminni, atuagaateqarfitsigut ilinniarfinnilu attavitsigut periarfissaqarput.
Jens B. Frederiksenip erseqqissarpaa, Naalakkersuisut ataatsimut isigalugu internetimik atuinerup akikinnerulersinneqarnissaa sulissutigimmassuk. Nangillunili aamma allappoq,
akit nunani allani ilisimasatsitut appasitsinneqarnissaat piviusorsiortuunngitsoq.
Allallunilu innuttaasut tamarmik internetimik akikinnerusumik atuisinnaalernissaat, Naalakkersuisut sulissutigimmassuk. Aammali sullitat aalajangersimasut, immikkut salliutinneqarnissaannik pilersaaruteqannginnertik erseqqissarlugu, salliutitsisoqarpat, tamanna sullitat allat akilertariaqassammassut.
