Akiitsut pisortat aningaasaqarnerannik ajornartorsiortitsipput

Innuttaasut pisortanut akiitsorpassuisa nunatta aningaasaqarniarnera artorsartippaa. Akiitsut siorna ima amerlatigaat, utertinneqaraluarpata Nunatta Karsiata amigartoorutai, 1 milliardi koruunit matussuserneqassagaluarlutik.

Imaluunniit aningaasaqarnermut naalakkersuisup, Palle Christiansenip oqarneratut:

- Pisortanut akiitsut tamarmik aqagu akilerneqaraluarpata, taava Nunatta Karsiata akiliisinaasusia isumanassanngikkaluarpoq aammalu Namminersorlutik Oqartussat kommunillu qinigaaffimmi uani (2013 tikillugu) amigartooruteqassanngikkaluarlutik.

Akiitsut assigiinngitsut misissuataarutsigit, angutit arnanut meeraqarfimminnut akiliutissaminnut akilinngitsuugaat amerlanerpaapput.

Akiitsut taakkua siorna aggustimi 218 millioni koruuniupput. Aningaasat taama amerlatigisut atorlugit siusinaartumik pensionisiallit tamaasa tigusartagaat qaammammut 13.000 koruunit missaannik ilaneqarsinnaagaluarput. Immaqaluunniit ilaqutariinnut meerartalinnut inissiassat 100-nit amerlanerit sananeqarlutik.

Akiitsut assigiinngitsut aalaakkaasuungillat. Tassa akiitsut ilaat akilerneqartarput aammali akilinngisat isumakkeerneqartarlutik, taavalu nutaanik akiitsunittoqartarluni.

Akileraartarnermut aqutsisoqarfimmi qitiusumik akiliisitsiniartarfiup maannakkorpiaq akiitsoqarnerpaat sammisarivai akiitsukinnerit tullinnguunniarlugit.

Kisianni innuttaasut ataasiakkaat akiligassatik akilersortuanngippatigit, akiitsut amerliartuinnassapput. Aamma inuit ataasiakkaat akiligassanik mikisunnguanilluunniit akiliinissaq soqutiginngippassuk isumakulunnartoq, Aningaasaqarnermut ataatsimiititaliap siulittaasua, Naaja Nathanielsen isumaqarpoq:

- Pisortanut akiliinissaq pisariaqanngitsutut isigineqannissaa pingaartorujussuartut uanga isigaara. Inuiaqatigiit ima aaqqissuussaapput, tamatta akileeqataanikkut tapertaasussaalluta, taamaanneralu pingaartikkipput ersersittariaqarparput. Taava aamma inuit akiitsunippallaanginerminni saaffiginneqartarnissaat pingaarpoq.

Nutaamilli akiitsuninnissaq manna pinaveersimatinniarneqalerpoq. Innuttaasut pisortanut attumassuteqarfigisaminnut akiliutissaat tamatigut betalingsservicekkut isumagineqartalersinissaat, inatsisinut naapertuunnersoq Naalakkersuisut manna misissorpaat.

Eqqarsaataavoq, innutaasut tamarmik pisortanut akiligassaminnut atatillugu PBS-imut atalersinneqassasut. Tassalu innuttaasut pisortallu akunnerminni akiligassaqarunik konto taanna aqqutigalugu imminnut aaqqeeqatigiittassasut.

Akiligassanik kinguaattoorsimaguit imaluunniit akileraarutinnik sinneqartooruteqaruit, kontokkut tassuuna aaqqinneqartassapput. Isumaqarpugut, taamaalilluta akiitsuararpassuit sivitsortukkut amerlisinnagit iluarsiisinnaalluta, Palle Christiansen oqarpoq.

Pisortanut akiitsoqarfiit misissoqqikkaanni, isertitanit akileraarutinit akilinngitsuukkat amerlanerpaanut tulliupput. Siorna aggustimi taakkua 208 millioni koruuniupput.