Akiitsuminnik akiliineq ajortut akiligassaqaqaat

Akiitsuminnik akiliineq ajortut akiitsoqaleraluttuinnarput.

- Pisiaat akisuujupput, mobiltelefonit akisuut, fjernsynit, stereoanlæggit allallu naafferarlugit akilersorneqarsinnaasut. Taama oqarpoq akiliisitsiniartarfiup Kreditinformation Grønlandip pisortaa Jan Seidsen.

Ukiuni kingullerni marlunni akiitsuminnik akiliineq ajortut akiitsui 36,5 million koruuninngorsimapput. Januaarimi 2008-mut sanilliullugit 35 procentimik qaffassimallutik. Naatsorsueqqissaartarfiup Experianip, KNR-i sinnerlugu naatsorsuinerata tamanna takutippaa.

Naak akiitsut akilinngitsuukkat amerleriarujussuarsimagaluartut, ukiuni kingullerni inuit akiitsuminnik akiliineq ajortut amerlerpiarsimanngillat.

Akiitsuminnik akiliinneq ajortut Grønlandbankip malussarfigisimanngilai. Taamaattorli aningaaserivimmi innuttaasut sullinneqarnerannut pisortaasup Peter Petersenip oqaluttuaraa, inuusuttut 20-kkunni ukiullit allaat 300.000-t 400.000-illu koruunit akornanni akiitsoqartut. Banki avaqqullugu aningaasanik atorniartarfinni arlalinni atorniartarsimapput:

-Aningaasanik atorniartarfiit arlaqarmata, siullermik atorniarfimminnut akiitsutik akilerniarlugit atorniartarfimmut allamut atorniartarput, taamaalillutik uniffeqanngiusattumik iliulersarlutik. Tamatumalu kingunerisarpaa akiitsullit allattorsimaffianni allassimasuulerlutik. Taama oqarpoq Peter Petersen.

Pisiniarfiit assigiinngitsunik najoqqutillit akiitsuminnik akiliinngitsoortartunit eqqugaasimasut, akiliisitsiniartarfiup Kreditinformation Grønlandip pisortaata oqaatigaa. Niuertarfiit assigiinngitsorpassuit akiitsoqarfigineqarput, radionit Fjernsyninillu pisiniarfiit, eqqiiaanermit suliallit, elektrikerit, sanasut allarpassuillu.

Grønlandsbankip aamma akiliisitsiniartarfiup Kreditinformation Grønlandip, aningaasanik atorniartarfiit pisuutippaat. Inuit kikkulluunniit ajornanngippallaamik atukkinneqartartut Grønlandsbankimi atuisut sullinneqarnerannut pisortap Peter Petersenip oqaatigaa:

- Ilaanni inuit allagarseriasaartarsimapput allassimasumik "Pilluarit 30.000 koruuninik atorsinnaannernut akuerisaavutit". Allagarsiaq mumikkaanni atuarneqarsinnaavoq, ukiuni qassini aningaasat atukkat utertinneqassanersut. Allagarsiarlu nassitsisumut atsioriarlugu utertikkaanni ullut 14-nit qaangiutiinnartut checki takkuttarpoq. Inuit ilaat isumaqartarsimapput aningaasanik eqquisimallutik, tamakkulu ilaqartarput utoqqarnik 70-it sinnerlugit ukiulinnik, bankimut checkimik aggortitsiartortunik. Taama Peter Petersen oqarpoq.

Aaamma Jan Seidsen Peter Petersenitut isumaqarpoq:

Ukiuni kingullerni aningaasanik atukkiisarfiit maani Kalaallit Nunaanni inuit akiitsoqareersut aningaasarpassuarnik atukkertarsimavaat, tassalu akiligassallit allattorsimaffiannit tamanna maluginiarneqarsimasoq, Jan Seidsen oqarpoq.

Grønlandsbankimi atuisut sullinneqarnerannut pisortap inuit mianersoqquai akiitsunik akiliisinnaajunnaartut allattorsimaffiannut pinaveersaaqqullugit:

- Akiligassaqalerujussuarnerup kingunerisarpaa aningaaserivinnit taarsigassarsiniarsinnaajunnaarneq. Tassami taarsigassarsiniartoqarpat, akiitsullit allattorsimaffiannut paasiniaasinnaagatta ilumut taarsigassarsiniartoq allami akiitsoqannginnersoq. Qanorluunniit telefonimut akiitsuni akilerniarlugu taarsigassarsiniaraluarpat allattorsimaffimmi allassimasuutigineqarpat itigartittarparput. Taama oqarpoq Peter Petersen.