Akiilisitsinissaq tullinnguuppoq
Jens Napaattoq immaqa ulapittarsimanermik inuiqatigiit aningaasaataannik atuigaangami akiliutimi allagartai tigunngitsoortarsimavai. Nuna Advokatit misissuinerisa ilaatigut tamanna takutippaa.
Jens Napaattoq ulluni makkunani angerlarsimaffimmini skuffini skabinilu ujaarlertussagunarpai.
Ujagai tassaassapput pappiarannguit qaqortut akiliinermut uppernarsaataasartut. Uppernarsaatimmi nassaarisinnaagunigit inuiaqatigiit aningaasaatai sumut atorsimanerlugit takussutissaqalissagaluarpoq.
Aningaasat 473.000 kronet nalinginut uppernarsaatit naatsorsuisartunut tunniuttarsimanngilai, taamaammallu naalakkersuisut maannakkut aningaasat taakkua utertinnialerpaat. Uppernarsaateqanngikkunilu tassa ilassinninnivimmut atorsimanerlugit oqaatiginnaanngilaa.
Jens Napaattup ilassinninnermut aningaasat 604.000 kronet siorna ukiortaamiit kinguarnissami tungaanut atorsimavai. Taakkunannga 473.000 kronet uppernarsaatissaqanngimmata atornerlunneqarsimasutut naalakkersuisunit nalilerneqarput.
Nuna Advokatit nalunaarusiaat malillugu Napaattup aningaasat imigassamut pujortagassanut nerisitsinermullu atortarsimavai. Ingammik ilaquttani ilisarisimasani parteeqatinilu ilagalugit. Persuarsiornerillu tamakkua inatsisit malillugit pisortatigoortumik ilassinninnertut akiligassaanngillat.
Radioaviisimi siornatigut saqqummiunneqareersutut Nuummi thailandimiut neriniartarfiat Charoen Porn Napaattup naalakkersuisutut akiligaanik isertitaqarluartarsimavoq.
Aamma Københavnimi atisaajartarfiit ilaat Wonderbar inuiaqatigiit akiligaannik najorneqartarsimavoq, natermullu asaatit, naatissiffissat erruissutillu aamma inuiaqatigiinnut akiligassanngortinneqartarsimapput.
Ilassinninnermut pissusissamisut atuisimassaguni uppernarsaatit amigaatini sapaatit akunneri pingasut ingerlaneranni nassaaripallattariaqassavai akiligassaminut ikilisaataaniassammata.
Jens Napaattoq oqaaseqartissinnaasimanngilarput. Rasmus Frederiksen 80.000 kronenik aamma akiligassaqarpoq. Jørgen Wæver Johansen, Johan Lund Olsen kiisalu Josef Motzfeldt 2.000 kroneniit 15.000 kronet nalingannik aamma utertitassaqartut paasinarsivoq.
