Air Greenland Akiata aalajangernissaa Namminersorlutik Oqartussat misissuiffigaat
Danmarkip nunatsinni mittarfiliortiternissamut aningaasaleeqataanissaanut atsioqatigiissutigineqareersorlu, Air Greenlandimik piginneqataanermi apeqqut pinngorpoq.
Namminersorlutik Oqartussat naalagaaffiup Air Greenlandimik piginneqataassutaanik pisinissaat, Danmarkip mittarfiliortiternissamut aningaasaleeqataanissaanut isumaqatigiissusiortoqarnerata kingorna soqutigineqalerpoq.
Tamannali qangali oqallisigineqareermat isumaqatigiiissut nutaartaqanngilaq. Naalakkersuisut siulittaasuata naalakkersuisoqarfiani pisortaq Søren Hald Møller KNR-imut taama ilisimatitsivoq.
- Air Greenlandip nalingata misissorneqarnissaa pillugu Aningaasaqarnermut Ataatsimiititaliaq immikkut ittumik aasaq manna 2,6 millionit koruuninik aningaasaliisoqarnissaanut akuersivoq. Suliap torersumik ingerlanneqarnissaa qulakkeerniarlugu suliamik ilisimasalinnik suleqatissarsivugut, Søren Hald Møller oqarpoq.
Air Greenlandimi piginneqataassutit pisiarineqassappata, ingerlatseqatigiiffiup nalinga aalajangersarneqaqqaartariaqarpoq.
Timmisartuussisarneq pillugu Sydbankimi naliliisartoq Jacob Pedersen siusinnerusukkut taama oqareerpoq, suliarlu taanna maanna tassa aallartinneqareersoq, Naalakkersuisup siulittaasuata naalakkersuisoqarfiani pisortap oqaatigaa.