Aki-Matilda Høegh-Dam Aaja Chemnitzilu Folketingimut qinigaaqqipput

Siumumeersup Aki-Matilda Høegh-Damip Inuit Ataqatigiinneersullu Aaja Chemnitzip Folketingimut ilaasortaaginnarnissaat paasinarsivoq.

Taaguussinerit 98 procentii kisinneqareerput - illoqarfiillu ilaanni taaguussinerit suli kisinneqanngikkaluartut qinersinerup inerneranut allannguinavianngillat: Aaja Chemnitz 26,6 procentinit taaguunneqarpoq.

Aki-Matilda Høegh-Dam 33,3 procentinit taaguunneqarpoq. Folketingimut 2019-imi qinersinermut naleqqiullugu marloriaammik amerlanerusunit taaguunneqarpoq.

Taaguunneqarnerpaat pingajuat tassaavoq Demokraatineersoq Anna Wangenheimm, Naleqqameersorlu Hans Enoksen taaguunneqarnerpaat sisamaraat.

Aaja Chemnitz Folketingimut 2019-imi qinersinermi taaguunneqarnerpaavoq. Siumumiilli maanna qaangerneqarpoq. Inuit Ataqatigiilli Nuummi katersortarfimmi katerisimaarfianni nuannapput.

-  Qinigaatitaqaqqinnissarput Inuit Ataqatigiinninngaanniit aallaqqaataaniilli siunnerfigaarput. Aamma partiinit allaninngaanniit unammineqangaatsiaraluarluta, Inuit Ataqatigiit nukittuumik inissisimasut takutipparput, Inuit Ataqatigiit siulittaasuat, Múte B. Egede, oqarpoq. 

- Pituttorsimanata maanna inissisimanerput atorlugu Qallunaat Nunaanni pissaaneq qanoq inississinnaanersoq pillugu aalajangiisuuneq periarfissarilerparput. Taannalu kalaallit Kalaallit Nunaallu pillugit sulilluta atussavarput, taanna oqarpoq.

Danmarkimi qinersinerup inerneranut taanna innersuussivoq. 

Saamerliimmi 87-inik tassani qinigaatitaqarput.

Talerperliit 73-inik qinigaatitaqarput.

Tassa imaappoq taakku arlaannaalluunniit 90-inik qinigaatitaqanngillaq – taamaalillutillu tamarmik amerlanerussuteqalersinnaanatik.

Atlantikup avannaaneersut saamerlerneernerusuusut

Tamatumalu nunanit avannarlerni qinersinernut soqutiginarluinnarsitsilersinnaapput. Nunarpummi Folketingimut marlunnik qinigaqartussaavoq, ilimagineqartutullu tamanna inerneqassaguni Siumut Inuit Ataqatigiillu Folketingimiittuuteqaleqqissapput. Taakkulu tamarmik saamerlerneersumik ministeriunerulertussamik tapersiiniarput.

Savalimmiuni Javnaðarflokkurinimeersoq Sjúrður Skaale taakkununnga ilaassappat, saamerliunerusunit qinikkat 90-iussapput, taamaasillutillu ataatsimik amerlanerussuteqaqqatalaassallutik