Akerliussutsiminik takutitseqqinniarput

Kenyamiut politiivisa gassit qulliliornartut imermillu seqqitsaatit sakkortuut akerliussutsimik takutitsisunut hunnorujulikkaanut, ullaarmanna illoqarfiit pingaarnersaanni Nairobimi aqqusinermi kaajallattarfimmi biilinik unitsitsisunut atorpaat.

- Tamatta Kenyamiuuvugut. Assigiinngissuteqanngilagut. Reuters naapertorlugu akerliussutsimik takutitsisut taama nilliapput.

Akerliussutsimik takutitsisut illoqarfissuup ilaani Kiberami inipalaaniit Nairobip qeqqanut ingerlaarput. Annoraaminermik qaqortumik niaqqumik qaavisigut qaaruserlerlutik orpikkanik tigumiarlutik inuiaassutsiminnillu erinarsuummik erinarsorlutik.

Taakku tassaaginnarput akerliussutsimik takutitsisut siulliit, illuatungiliuttullu ullumi aqqusinerni akerliussutsimik takutitsinernik tuusintilikkaanik inuttaqartunik aaqqissuussiniarput.

Kenyami illuatungiliuttut præsidentimut qinersinerup inernera akerliussutsimik takutitsivigaat, qinersinermimi maanna præsidentiusoq Kibaki illuatungiuttut siuttuannut Odingamut ajugaasutut suaarutigineqarmat.

Illoqarfissuup Nairobip qiterpasinnerusortaani akerliussutsimik takutitsinissaq inerteqqutigineqaraluarpoq, politiillu tuusintilikkaat tamaanga nakkutilliiartoqqusaapput, tamannali illuatungiliuttut siuttuata Raila Odingap ilaasalu soqutiginngilaat.

Decembarip 27-anni qinersisoqarpoq, ullormilu tassanngaanniit aattalimmik aporaattoqartarpoq, maannamullu inuit 342-t toqutaareersut oqaatigineqarpoq.