- Suna tamaat maanna nakkutigisinnaanngorparput. Sakkutuut isumannaallisaasut saassussisaqattaarnertik taamaatippaat, sakkutuunit oqaaseqartartoq, Sansern Kaewkamnerd, oqarpoq.
Bangkokip ilaa, akerliussutsimik takutitsisut sapaatip akunnerini arlalinni ungoqqasimasaat, sakkutuut 32.000-it missaanniittut ullaaq unguvaat, akerliussutsimillu takutitsisut biilit assakaasui napisuitsullu atorlugit assiaqutiliarisimasaat qamutit sorsuutit qaleruarsuallit aqqusaalutoralugit aserorterpaat.
Sisamat toqutaapput, 50-inillu amerlanerit ikiligaallutik.
Toqutaasoqarlunilu ikiligaasoqarmat akerliussutsimik takutitsisut siulersortaat arlallit politiinut tunniutiinnarput. Siulersortit ilaata, Jatuporn Prompanip, politiinut tunniutiinnarnera Thailandimi TV-qarfimmit takutinneqarpoq, siulersortillu allat tunniutiinnariartortut aamma takuneqarsinnaapput.
Nutaarsiassaqartitsivinni allaaserineqarpoq amerlanerusunik toqutaasoqarnissaa pinngitsoorniarlugu tunniutiinnartut.
- Tamassi utoqqatserfigaassi, inunnilli amerlanerusunik annaasaqarusunngilanga. Pisimasut uanga nammineq aamma aliasuutigeqaakka, Jatuporn Prompan, Bangkokip ilaani akerliussutsimik takutitsisut sapaatip akunnerpassuini tiguaqqasimasaanni tapersersortiminut oqarpoq.