Akerliussutsimik takutitsisut: Naammaleqaaq! Naammaleqaaq!
Inatsisartut Ukiaanerani Ataatsimiinnissaannut qinikkat naalagiaqatigiinnerat qulinut aallartimmat, innuttaasut 5-600-t missaanniittut Nuummi Amisut nalaanni naapipput, oqaluffiullu tungaanut ingerlaaqatigiillutik. Akerliussutsimik takutitsineq sakkortuvoq, innuttaasut kamapput.
Oqariartuutaallu ersarilluinnarpoq, tassaasoq: Aleqa Hammond tunuartariaqartoq, nutaamillu qinersisoqarluni.
Innuttaasut naammatsittut
Akerliussutsimik takutitsineq aallarteruttornerani innuttaasut sooq peqataanersut tusarniaavigaagut. Tamarmillu assigiimmik oqariartuuteqarput, Aleqa Hammond tunuartariaqarpoq, nutaamillu qinersisoqartariaqarlunilu:
- Oqariartuutigut ersarissorujussuupput: Akileraarutigut atornerlunnagit. Aleqa Hammond tunuassooq, nutaamillu qinersisoqarluni, Aputsiaq Blytmann innuttaasoq KNRimut oqarpoq nangillunilu:
- Qinikkat akileraarutigut atornerlukkaat innuttaasutut assut pakatsinarpoq.
AAMMA ATUARUK Qinerseqqusillutik Københavnimi akerliussutsimik takutitsisut
Akerliussutsimik takutitseqataasut ilaat aamma naammatsinnini oqariartuutigaa
- Pissutsit ingerlaneri akuerisinnaajunnaarakkit akerliussutsimik takutitsivunga, Karen Kleemann meeqqerivimmi ningiuusoq oqarpoq, nangillunilu:
- Ilungersorluta sulilluta akileraarutigisartakagut atornerlunneqarput. Tamanna akuerisinnaanngilara. Issiasut tunuartariaqarput nutaamillu qinersititsisoqartariaqarluni, Karen Kleemann isumaqarpoq.
