Qinerseqqusillutik Københavnimi akerliussutsimik takutitsisut

KØBENHAVN: Inatsisartunut qinerseqqikkusuppugut.

Taama oqarpoq Ortu Mørch Olsen, Københavnimi akerliussutsimik takutitsinissamut aaqqissueqataasoq.

- Ulluni kingullerni Kalaallit Nunaanni naalakkersuisut akornanni pisunik quarsaartinneqaqattaarpugut, ingammik saqqummiunneqarmat Naalakkesuisut siulittaasuat nunap aningaasaataanik atornerluisimasoq. Tassunga killeqarpoq.

Atornerluisoqarsimanera kalaallinut nunatta avataaniittunut aamma sunniuteqarpoq

-Naallu Atlantikup illuatungaani taama pisoqaraluartoq aamma kalaallinut nunamik avataaniittunut sunniuteqartoq, Ortu Mørch Olsen oqarpoq.

- Kalaallit Nunaannut ilaavissuuvugut. Kalaallit Nunaanni inuiaqatigiit ineriartornerannut kinaassutsitsinnullu ilaavugut, timitsinni eqqarsartaatsitsinnilu nunatta siunissaa ippoq. Tamaasa nammappagut.

- Ullut kingulliit nutaarsiassat Kalaallit Nunaanneersut malinnaavigalugit pakatsinarsimapput. Pakatsinarsimavoq toqqaannartumik oqallinnernut peqataasinnaanani. Taamaattumik ullumi katersuunnissarput pisariaqarsimavoq, ersarissumillu paatsoorneqarsinnaanngitsumik nalunaaruteqarluta.

Qallunaat tusagassiuutaanni assorsuaq sammineqarpoq aasit Kalaallit Nunaanni politikerit aningaasanik atornerluisut, tamanna qanoq isigaajuk? Ortu Mørch Olsen aperineqarpoq akillunilu.

- Kalaallit Nunaanniinnaanngilaq. Una akerliussutsimik takutitsinerunngilaq Lars Løkke Rasmussenip atornerluisimaneranut. Una akerliussutsimik takutitsineruvoq nutaamik qinerseqqusilluni, Naalakkesuisut siulittaasuat uppernassuseqanngimmat.