Akerliussutsimik takutitsisoqartussanngorpoq
Kalaaleq Danmarkimi najugaqartoq Ortu Mørch Olsen, akerliussutsimik takutitsinissamik aaqqissuisuuvoq.
Akerliussutsimik takutitsinissaq septembarip qulingiluaani pisussaq Skt. Annæ Pladsip eqqaani nalunaaqutaq marlup qeqqa aallartissaaq.
Kalaallit Illuata tungaanut ingerlaaqatigiittoqareerpat paasititsiniaalluni ataatsimiititsisoqassalluni.
- Greenpeacep nammineq soqutigisani kisiisa siunertaralugit iliuuseqarnerminut Qeqertarsuup eqqaani uuliasiorfimmik toqqaanera tupigusuutigaara, tassami taamatut iliorneq pisuusaarneruvoq illersorneqarsinnaanngitsoq, Ortu Mørch Olsen oqarpoq.
Kalaallit Nunaanni pisuussutit innuttaasunit pisinnaatitaaffigineqarnerat Ortu Mørch Olsenip kaammattuutimini erseqqissaatigaa.
- Pisinnaatitaaffik taanna iluaqutigalugu suliffiit nutaat nunattalu aningaasaqarneranik ineriartortitsineq periarfissaalissapput tamannalu kialluunniit akerlerisinnaanngilaa, Ortu Mørch Olsen oqarpoq.
Akerliussutsimik takutitsinerup nalaani qilaatersortoqassaaq.
