Akerliussutsimik takutitsisoqarnissaa aarleqqutigineqartoq

Silap pissusaata allanngoriartornera pillugu ataatsimiittunut akerliusut aarlerisaarutigaat ataatsimeersuarfiup, Bella Centerip, silataani akerliussutsimik takutitsiniarlutik, ataatsimeersuartunullu iserniarsariniarlutik, nutaarsiassaqartitsivimmi Ritzauimi tamanna allaaserineqarpoq.

Attaveqarfiup Climate Justice Actionip naatsorsuutigaa, akerliussutsimik takutitsisut tamakku takkutinngitsoornavianngitsut, naak politiit sapaatip akunnerata naanerani inunnik 1000-nit amerlanernik tigusarinnikkaluartut.

- Inuit qunutitassaanngillat. Inuit tusindtilikkaat takkunnissaat ilimagaara, inuinnaammi naalakkersuisooqataanerannut soqutiginninnertik pissutigalugu isummaminnik saqqummiusserusukkaluttuinnarput, Tannie Nybo, attaveqarfimmi Climate Justice Actionimi, avammut oqaaseqartartoq, oqarpoq.

Taassumali aarleqqutigaa akerliussutsimik takutitsiniarneq politiit ima pinngitsoortinniartigissagaat, immaqa suli aallartinngitsorluunniit unitsissinnaallugu.

Politiit pisortaanerat, Per Larsen, nutaarsiassaqartitsivimmit Ritzauimit issuarneqarpoq, sapaatip akunnerata naanerani aatsaat taama amerlatigisunik politiit tigusarinninnerisa isummaminnik saqqummiussisut paasitissimassagaat, sakkoqartoqarnissaa, kiinarpalersortoqarnissaa politiinulluunniit peqqarniisaartoqarnissaa politiinit akuersaarneqanngilluinnartoq.