Akerliussutsimik takutitsinermiit aalisarusunnerupput
Sinerissap qanittuani aalisartut akerliussutsimik ulluni kingullerni takutitsineranni peqataasut amerlannginnerat radioaviisimi sammineqareersorlu, KNAPK-p siulittasua Leif Fontaine, taama nassuiaavoq.
Aalisartut atukkatik pitsaanerulequllugit ulluni kingullerni ingerlaqatigiittarput. Ilulissani qaleralinniarfissuussumi aalisartut 20-it, Qaqortumilu arfineq marluk marlunngormat ingerlaaqatigiittut, Nuummi pingasunngormat ingerlaaqatigiinnermi 120-usut KNR-miit missiliorpavut.
Aalisarneq Nunatsinni inuusutissarsiortini pingaarnerpaasoq eqqarsaatigigaanni, akerliussutsimik takutitsisut amerlagisassaanngitsut, oqaluttuarisaanermik ilinniagartooq Axel Jeremiassen naliliivoq.
- Akerliussutsimik takutitsinerni peqataasut amerlannginnerannut peqqutaavoq, pisassiissutit nungulersut aalisartunit ilangiiffigerusunneqaqimmata, KNAPK-p siulittaasua Leif Fontain allappoq.
Akerliussutsimik takutitsisut taama ikitsigimmata, tamanna KNAPK-p siulersuisuisa sanngiinnerannut, aammalu akerliussutsimik takutitsisut politikkikkut isummertarnerisa sumik sammiveqarnerat peqqqutaasinnaasoq, Axel Jeremiassen aamma naliliivoq.
Leif Fontainili allappoq, akerliussutsimik takutitsinissat immikkoortortaqarfinniit piumasaqarnerannik aallaaveqartut, oqarlunilu, kattuffiup maleruagassani malillugit, siulittaasup partiinut sumulluunniit pituttorsimasusaanngitsoq.