Akerliussutsimik takutitsineq iluaqutaavoq

Akerliussutsimik takutitsinermi Nuummi 1000 missaannik peqataaffigineqartumi naalakkersuisut siulittaasuata Hans Enoksen-ip akerliussutsimik takutitsisut aaqqissuisui allaffimminut ataatsimeeqatiserai.

Aaqqissuisut ataatsimiinnerminni piumasaraat nuna tamakkerlugu iliuusissanik aaqqissuisoqassasoq, meeqqanut isumasioqatigiiffimmik ambassadørimilluunniit pilersitsisoqassasoq. Taassumallu qulakiissagaa meeqqat inuusuttullu atugaasa ajunngitsumik ingerlanissaat. Piumasaqaatit ilagaattaaq ilisimariikkanik atorluaanissam, perorsaasut akissarsiaannik iluarsiinissaq ilinniaqqissinnaanerinillu qulakkeerinissaq.

Ataatsimiinnermi naalakkersuisut siulittassuata atorfilittaatalu nassuiaassutigaat namminersornerullutik oqartussat iliuusissatut pilersaqarutaat, soorlu aamma iliuusissat aallartisareersut erseqqissarneqartut. Nassuiaanerit saniatigut tassa upernaaru isumasioqatigiisitsoqassaaq, taassumalu siunertarissavaa ilaqutariit amerlanerit nukissarneqarnerusut peqqinnerusullu.