Akerleriilerput

Narsaq, Qaqortoq Nanortalillu isumaqatigiikkunnaavipput.

Narsap borgmesteriata, Kiista P. Isaksen-ip, Kujataamioqatigiinni siulittaasuuffimmik akisussaasuusup, oqarnera malillugu, Nanortallip borgmesteriata, Kristine Raahaugep radioaviisimut ippassaani erseqqissaanera pissutaatinneqarpoq.

Kristine Raahaugep erseqqissarpaa, kommunitut kisimiinnissartik Nanortallip Kommuniata aalajangiusimaagaa. Tamanna pillugu Kiista P. Isaaksen ima oqarpoq:

-Ataatsimiinnissaq ullormik ataatsimik sioqqullugu Nanortallip Kujataani kommuninut pinngitsaaliniarneqartutut nipilimmik Kujataamioqatigiinnut nalunaarnera pissusissamisuunngilaq. Taamaalilluta nalunngereerparput Nanortallip kommunia qanoq isumaqassanersoq, Kiista P. Isaksen oqarpoq, nangillunilu:- Oqaluuserissat allat pingaaruteqarput. Kisianni ersarissorujussuarmik oqariartuuteqarfigineqarutta pinngitsaaliiniartutut, soorunami kinaluunniit taama nalilerneqaruni ersarippoq, taava ataatsimiinnissaq qanoq pissava? Taama aperaaq Kiista P. Isaksen.

Siumukkut kommunalbestyrelsimi tallimanik ilaasortaqarnertik pissutigalugu kattunnissamut akerliunermut amerlanerussuteqarput, illuatungaat Atassut, IA, Demokraatillu katillutik sisamanik ilaasortaatitaqarput.

Narsami kommunalbestyrelsimut ilaasortat ippassaq Qaqortuliarput, Kristine Raahaugep tusagassiuutitigut kattunnissamut aalajangiusimanninnerminnik oqarnera oqaluuseriartorlugu, Nanortalimmilu ataatsimiinnissap unitsinnissaa tassani aalajangerneqarpoq.