Akeqanngitsumik oqalutseqartarneq attatiinnarneqassangunarpoq
Napparsimasut tamarmik Danmarkimi ukiut arfineq-marluk sinnerlugit najugaqarsimasut, nakorsiaraangamik oqalutsimillu pisariaqartitsigunik 150 koruuninik akiliisussaapput. Peqqissutsimut inatsisit allannguutaat juunip aallaqqaataanni atuutilerpat taamaalisussaavoq.
Inatsisip allannguutissaatut siunnersuut oqallisaaqaaq, - ilaaatigullu Folketingimut ilaasortaq IA-meersoq Juliane Henningsen kalaallit malitarisassanut ilaannginnissaat pillugu ilungersorsimavoq.
Bertel Haarderip malittarisassat allannguutaanni kalaallit ilaatinneqarnissaat siusinnerusukkut aalajangiusimallugu oqaatigigaluarpaa, maannali Danmarkimi peqqissutsimut ministeri kalaallit akerliunerannut tusaanialersimagunarpoq. Tassami ministeeriaqarfik ilisimatitsivoq, malittarisassani inuit aalajangersimasut ilaatinneqannginnissaat isumaliutigineqartoq. Matumani kalaallit pineqarnersut ministeeriaqarfiup oqaatigererusunngilaa, ministeri allannguutissanut suli isumminngimmat.
Allannguinissaq pisussanngorpoq, siunnersuut tusarniutigineqareersorlu. Kalaallit oqaatigiumasaat isumaliutinut ilaassapput - soorluttaaq Danmarkip naalagaafeqatigiinnut pisussaaffii ilanngunneqassasut, ministereqarfimmiit ilisimatitsissutigineqarpoq.
Taamatut nalunaaruteqartoqarnera tunngavigalugu Juliane Henningsenip ministeri aperiniarpaa, paaserusullugu kalaallit nakorsiarnerminni akeqanngitsumik oqalutseqartinneqartarnerat attatiinnarneqassanersoq. Atlantikup Avannaani Suleqatigiit allaffeqarfiat taama nalunaarpoq. Taakku Radikale Venstret aamma Socialdemokraatit attaveqarfigaat, taakkulu kalaallit piumasaqaataannut tapersersuipput.
Malittarisassanngortussani assigiinngitsut mininneqartussaareerput, ilaatigut inuit soorlu nappaateqarneq pissutigalugu oqaatsiminnilluunniit annaasaqarsimallutik, danskisut ilinniarsimanngitsut, oqalutsimut akiliiisassanngillat, soorluttaaq ilaqutariit merartallit aamma mininneqartut.
- Meeqqat angajoqqaamik qallunaat oqaasiinik ilikkanngitsoorsimanerannut akisussaatinneqassanngillat. Aamma angajoqqaat akiliisussaanertik piinnarlugu meeqqaminnik nakorsiartitsinaveersaarnissaat pinngitsoorniartariaqarparput, Bertel Haarder Atuagagdliutinut oqarpoq.
Peqqissutsimut naalakkersuisoq Agathe Fontain Radioaviisimut marsimi neriorsuivoq, ajornartorsiut danskit nunami namminermi peqqissutsimullu ministeriannut saqqummiunniarlugu. Kisianni tamanna pisimanngitsoq Nunamut namminermut peqqissutsimullu ministereqarfik ullumi ilisimatitsivoq.
Matumani erseqqissarneqassaaq malittarisassat nutaat, taamaallaat kalaallinut ukiut arfineq-marluk sinnerlugit Danmarkimi najugaqarsimasunut atuutsinniarneqarmata. Napparsimasut Nunatsinneersut Danmarkimut suliaritikkiartortut akeqanngitsumik oqalutseqarsinnaajuaannarput.
