AK: Tjenestemandiuneq soraarninngornissap tungaanut atuuppoq

Qaasuitsup kommunissaani borgmesterinngortussap kommunini kattuttussani arfineq-pingasuusuni Inuutissarsiornermi pisortatut aamma Inuutissarsiornermi siunnersortitut atorfillit, kommunimi atorfeqarunnaarlutik Destination Avannaani atorfeqartussanngorlugit nuunnissamut neqeroorfigineqartussanngornerat Ikaarsaariarnermut Ataatsimiititaliami ilaasortap Palle Jeremiassenip uppernarsarpaa.
Allattoq Louise M. Kleemann
decembarip 08-at 2008 06:28

Tamannali tusarlugu Atorfillit Kattuffiata AK-p ernumanartoqartippaa.

- Kommunini pineqartuni atorfillit pineqartut ilaat ullumikkut tjenestemanditut atorfeqarput. Taakkualu oqatsiaannarnikkut kommunimi atorfeqarnermiit piginneqatigiiffimmi namminersortumi atorfeqalernissamut nuutinneqarsinnaanngillat, AK-mi siulittaasoq Erik Hammeken oqarpoq.

Pisortani, Namminersornerullutik Oqartussani kommuninilu taamaallaat tjenestemanditut atorfeqartoqarsinnaavoq. Tjenestemanditullu atorfeqarneq soraarninngornissap tungaanut atorfiummat oqaannarluni soraarsinneqarsinnaanngillat.

- Tjenestemanditut atorfillit Destination Avannaanut nuukkusussanngippata pinngitsaalineqarsinnaanngillat. Tjenestemandi kommunip iluani atorfimmik allamik naleqquttumik neqeroorfigineqarsinnaanngippat soraarsinneqassaaq, ukiunili tulliuttuni pingasuni akissarsiani pigiinnassallugit. Atorfimminullu tunngatillugu ineqartinneqarsimaguni, aamma taanna ukiuni tulliuttuni pingasuni pigiinnassavaa, Erik Hammeken erseqqissaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq