AK: Sulisunik pisuutitsinera akuerineqarsinnaanngilaq!
Karsten Stounberg soraarniuteqareernermi kingorna tusagassiutinut nalunaarummini allappoq, ingerlatsivimmi piginnaasatigut periarfissarititaasut aallaavigalugit aammalu aaqqinniagassat annertussusaat aallaavigalugit nammineq suliaminik naammaginartumik naammassisaqarsinnaanani.
- Naatsumik oqaatigalugu, soraarniuteqarnermini sulisut piginnaasaqannginnerarlugit pisuutippai. Taama oqarnera akuerineqarsinnaanngilaq, Atorfillit Kattuffianni siulittaasoq, Erik Hammeken allappoq.
Ingerlatsivimmi tassani sulisunik arlaqartunik Atorfillit Kattuffiat ilaasortaqarpoq. "Ukiorpassuarni ajunngitsumik uparuarneqarsimanngitsumillu sulisimasunik", Erik Hammeken taama allappoq.
- Pisortaajunnaartup sivikitsumillu pisortaasimasup, sulisut atorsinnaanngitsutut nalilerpai. Taama tunngasvilersuinera akikippallaaqaaq, soraarniuteqarneranut allat pissutaasimassapput, siulittaasoq Erik Hammeken allappoq.
Juunip aallaqqaataani ukioq manna Karsten Stounberg atorfinippoq, septembarip aallaqqaataani atuutilersussamik soraarniuteqarluni.