Ajutoornermi ajunaartoqarnera: Angutit inuusuttut aalakoornartutorpallaarsimallutik umiatsiarsimapput

Nuup Kangerluani ajutoornermi ajunaartoqarnerani peqataasut imigassartorpallaarsimapput.

Politiit Danmarkimi aammik misissueqqissaartitsinerata tamanna takutippaa.

Ajutoornermi arnaq 20-t sinnerlugit ukioqartoq ajunaarpoq.

Ajutoorneq pinerluuteqarsimasunut inissiisarfiup nutaap Sermitsiallu qeqertaata akornanni juulip ulluisa 19-ianni pivoq.

Umiatsiamik ajutoortut Kalaallit Nunaanni politiit oqarnerat naapertorlugit 50 knobit missaannik sukkatigisumik ingerlaarnerminni kassoq aporpaat. Inuusuttut arfineq-marluk 20-t 30-llu akornanni ukiullit umiatsiamiipput. Taakkunannga pingasut immamut igeriussaapput – taakkunannga ataaseq arnaq inuusuttoq ajunaarpoq. 

AAMMA ATUARUK Politiit ajutoortut pillugit: Inuusuttut 50 knobersornerminni kassumut aporput

Politiit angutit marluk mianersuaalliorluni toqutsisimasutut, umiatsiamik imigassartorsimallutik ingerlatsisimasutut mianersuaalliorlunilu innarliisimasutut tamatuma kingorna unnerluutigaat. 

Aammillu misissuinerit angutit marluk aalakoornartumik akuerisaasumit ataatsimik promilleqarnerusimasut maanna takutikkaat, nunatsinni politiit nalunaarutigaat.

Angutit marluk suliamut atatillugu suli unnerluutigineqarput.

Imaani angalanissamut promille akuerisaasoq 0,5-iuvoq.

AAMMA ATUARUK Umiatsiaq Nuup Kangerluani ajutoormat arnaq inuusuttoq ajunaartoq

Umiatsiami ilaasut allat ajutoornerup kingorna napparsimmaviliaanneqarput.

Taakkunannga ataaseq arnaq Danmarkiliaanneqarpoq, sulilu napparsimmavimmi uninngalluni. Politiit oqarnerat naapertorlugu arnaq singernermigut aqqunartitingaatsiarsimallunilu kanaava ajoqusingaatsiarsimavoq.

Napparsimmavimmukaanneqarsimasut sinneri angerlartinneqareerput.