Ajutoornerit nalunaarutigineqartaleriartorput

Sullivimmi ajutoornerit nalunaarutigineqartarnerat atugaaleriartorpoq.

2006-imi sulitilluni ajutoorsimanerit 2005-imut sanilliullugit qaffariarsimapput.

Qaffariaallu tamanna inuit nalunaaruteqarnissamut qaammaasimasaqalernerunerannik peqquteqartoq

Sullivinnik nakkutilliisoqarfimmi immikkoortumi pisortaq Arnaq Grønvold oqarpoq.

- Kisitsisit nutaat 2006-iminngaanneersut ersersippaat 2005-imut naleqqiullugu ajutoorsimasut 12 procenti pallillugu amerleriarsimasut. Taassuma saniatigut toqusut nalunaarutigineqarsimasut sisamaapput, 2005-imilu marluinnaapput. Annertuumillu ajutoorsimasut 2005-imut naleqqiullugit 16 procentimik qaffassimallutik, Arnaq Grønvold nassuiaavoq.

Taanna isumaqarpoq ajutoornerit nalunaarutigineqartarnerisa amerleriarsimanerat paasisitsiniaanerup sakkortusineqarneranik peqquteqartoq.

- Siornatigut immersugassaq qallunaatuinnaagaluarpoq 2002-miili kalaallisuunngortikkatsigu assut taanna atorneqartarsimavoq, oqarpoq.

Arnaq Grønvold qalleqqissaavortaaq suliffigissaasut paasisitsiniaajuarnerat peqqutaaqataasoq.

- Suliffigissaasut ataaniittut kattuffiit ilaasortaminnut paasisitsiniaasarput, kiisalu arbejdsmiljøuddannelsemi pikkorissaasarnerit amerligaluttuinnarlutik, oqarpoq.

- Eqqartornerusaleraat malunnarpoq, soorlu suleqammik ajutoortoqartillugu eqqartornerusalerpaat tamatuma sullivimmik nakkutilliisoqarfimmut nalunaarutigisariaqartoq, Arnaq Grønvold oqarpoq.

Nangilluni nassuiaavoq ataatsimiittarnerit annertusiartortut.

- Suliffiup timikkut tarnikkullu peqqinnartuunissaanut paasisimasat annertusiartorput, Arnaq Grønvold oqarpoq.

2006-ip ingerlanerani sulitillutik toqusut sisamaasut aatsaat taamak amerlatigipput.