Ajunaartut
Slovakiamiut umiarsuaata assartuutip Gedserip kujataani ippassaq kinngunerata kingorna Sakkutuut imarsiortut qullersaqarfianit umiartortunik arfineq marlunnik ujarleraluareerlutik umiartortut ajunaarsimanissaat naatsorsuutigilerpaat.
Allattoq Elisa Isaksen
Sakkutuut imarsiortut aqqartartuisa umiartortut marluk ajunaarsimasut umiarsuarmi kiveqqasumiittut ualeq manna qaqippaat, taakkua tassaallutik angut arnarlu. Umiarsuup inuttai tallimat suli maqaasineqarput. Ippassaq umiartortut pingasut immamiit annaanneqarput ataaserlu ajunaarsimasoq nassaarineqarluni.
- Nassuerutigisariaqarparput umiartortut sinnerisa ajunaarsimanissaat naatsorsuutigigatsigu, Sakkutuut imarsiortut qullersaqarfianni tusagassiisartoq, Klaus Randrup, nittartakkamut avisen.dk-mut oqarpoq.