Ajunaartoqareersoq siku angallavigeqqujunnaarpaat

Tasiilami sikup saappallaarnera pissutaalluni angallaffiusinnaajunnaartoq, Tasiilami politiit nalunaarutigaat. Inuit pingasut sikukkoortillutik nakkarnerat inuusuttunnguup inuuneranik ippassaani unnuakkut akeqarpoq, nakkartup aappaa ajunaarsimassangatinneqarpoq.
Allattoq Mads Lynge
juunip 01-at 2010 12:51

NutartigaqAngut 19-inik ukiulik Tasiilap avannaatungaani kangerlummi ipilluni ippassaani unnuakkut ajunaarpoq. Nakkartup aappaata timaa suli nassaarineqanngitsoq politimesterip tullersortaata Morten Nielsenip nalunaarutigaa.

KNR-imi ippassaq nutaarsiassami oqaatigineqarpoq angut 19-inik ukiulik annassimasoq, kukkussut KNR-imit ajuusaarutigaarput.

Angutit marluk arnarlu ataaseq sikuminngaanniit aalisarniarlutik Tasiilap avannaatungaanukarsimapput, sikukkulli nakkarlutik.

Arnaq nammineerluni annassinnaasimavoq politiillu ippassaq unnukkut nalunaaquttap aqqarnup missaani kalerrissinnaasimallugit.

Ajutoorfigineqartoq umiatsiamik orninneqarsinnaasimanngimmat politiit qulimiguullit atorlugit unnuaq nalunaaquttap ataatsip missaani ajutoorfiusumukartinneqarput, nalunaaquttallu akunnerup affaata ingerlanerani Tasiilamut utersinnaasimallutik, angutip aappaata timaa issimasoralugu.

Pingajuat 19-inik ukiulik ajunaarsimassangatinneqarpoq. Angut 19-inik ukiulik nalunaaqutaq pingasut missaata tungaanut ujaarineqaraluarpoq kinguneqanngitsumilli.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq