Ajugaasullu tassaapput...

Suliffeqarfik sorleq kiilunik katataqarnerusinnaanersoq allornernillu amerlanernik angusaqarsinnaanersoq Kalaallit Nunaanni Brugsenimi sulisut Grønlandsbankimilu sulisut akornanni unammineq, qaammatit pingasut matuma siorna aallartittoq, maanna naammassineqarsimalerpoq.
Allattoq Louise M. Kleemann
juunip 26-at 2011 14:10

Unammineq marsip aallaqqaataani aallartippoq maajillu 31-ani naammassilluni. Qaammatit pingasut taakku ingerlaneranni 125,6 kiilu peqataasunit 60-init katanneqarpoq nunarsuarlu kaajallangajallungu pisunnermut assersuunneqarsinnaasumut pisuttoqarluni.

Sanigorsernermi angusarissaarnerpaaq tassaavoq Kalaallit Nunaanni Brugseni. Allornernillu kisitsissutit atorlugit angusarissaarnerpaaq tassaalluni aamma Kalaallit Nunaanni Brugseni.

Sanigorsallaqqinnerpaaq tassaavoq Søren Olsen, taassuma 14 kiilu katakkamiuk. allornernik kisitsissut atorlugu angusarissaarnerpaaq tassaavoq Jørgen Hammond aamma KNB-mi immikkoortortaqarfimmi aqutsisoq.

Unamminerup nalaanni sulisut akornanni ataqatigiinnerulerneq suliffeqarfinnit nuannaarutigineqarpoq. Aamma nappaatit inooriatsimut attuumassutillit soorlu sukkorneq il.il. pinaveersaartinneqarnerannut suleqataanerulernertik suliffeqarfiit taakku marluk tulluusimaarutigaat.

- Pingaartorli unaavoq, tassalu ingerlaannarnissaq, peqqinnarnerusumik inuuneqalernissaq allanngueqataanissarlu, Brugsenip tusagassiorfinnut nalunaarutaani ilaatigut taama allaqqavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq