Ajortumeeriniat Østre Landsretimi eqqartuunneqartut
Odensemi ajortumeeriniarlutik pilersaaruteqartutut pasisat sisamasut akornanni pingasut Østre Landsretimi eqqartuunneqarput.
Sisamaat 19-inik ukioqartoq apriilimili iperagaasoq eqqartuussisussatut qinikkanit pinngitsuutinneqarpoq.
Politiit Odensep illoqarfiata ilaani Vollsmosemi septembarimi inissiarsuarni ungusingamik katillugit qulinguluanik tigusarinnipput.
Taamani arfineq marluk paarnaarussaapput, taakkunanngalu sisamat Danmarkimi ajortumeerinissamik pilersaarusiorsimasutut eqqartuussassanngortinneqarlutik.
Politiit isertortumik paasiniaasartuisa inunnik pasineqartunik sivisuumik nakkutilliisimapput, pasineqartullu akuutissanik qaartartuliarineqarsinnaasunik laboratorianilu atortorissaarutinik qaartartuliorfiusinnaasunik pissarsiaqarsimanerminnik eqqartuunneqarput.
Eqqartuussinerup nalaani apeqquserneqartarsimasoq ataasiuvoq, tassa politiit isertortumik paasiniaasartuisa kilitsissiatut sulitissimasaata uppernassusia.
Eqqartuunneqartut qanoq sivisutigisumik paarnaarussaassanersut radioaviisip aallartinnerani suli paasineqanngilaq, taamaattorli eqqartuunneqartut marluk ukiuni 14-ini paarnaarunneqarnissaat unnerluussisunit piumasarineqarnikuuvoq.
