Ajornartorsiutit qimarratigivaat

Odensemi Kalaallit illuata ningiua Kirsten Mærsk ima oqarpoq:

- Maani Kalaallit Illuanni nutsernerminnut atatillugu ajornartorsiorlutik saaffiginnittut naammattuukkavut tassaanerupput, inissaaleqinertik pillugu nutsertut, meeqqat naammaginnanngitsumik atuartinneqarnissaannik ernumassuteqarlutik nutsertut, nunatsinni peqqinnissaqarfiup toqqissisimanannginnera pillugu nutsertut kiisalu inunnik isumaginninnermik tunngassuteqartunik ajornartorsiorlutik nutsertut, Kirsten Mærsk radioaviisimut oqarpoq.

Nutserartut amerliartorusaartut Odensimi kalaallit illuata malugisinnaavarpaa. Maannalu nutserartut pillugit misissuineq Odensep kommunea suleqatigalugu ingerlanneqarpoq 2008 -llu aallartinnerani saqqummiunneqassalluni. Tassani takuneqarsinnaassapput 2007-imi nunatsinniit Odensemut nutsertut qasserpiaanersut aamma suna nutsernerminnut peqqutigineraat.

- Maani kalaallit illuanni pingaartipparput nutsertut erngerlutik ajornartorsiutiminnik ikiorneqarnissaat, tamannalu Odense Kommuneata suleqatigineratigut ingerlanneqarpoq. Nutsertut ajornatorsiutigisinnaasaannik ikiuineq erngertumik ingerlanniarneqartarpoq, Kirsten Mærsk oqarpoq.

Taassuma aamma oqaatigaa amerlasuut ajornartorsiutiminnik siornatigut ikiorneqartarsimanngimmata. Assersuutigalugu suliffissaaleqisut ilimagisamiit ikinnerunerat takuneqarsinnaalersimasoq Kirsten Mærskip aamma oqaatigaa.

2006-imi inuit 200-t missaanniittut Odensemi kalaallit illuata inunnik isumaginnittoqarfianut saaffiginnissimapput.