Air Icelandip ajutoornera: Suli qularnaatsumik paasisaqanngillat

Air Icelandip timmisartua Nuup mittarfiani marsip sisamaat ajutoorpoq. Timmisartut ajutoornerinik paasiniaasartut nalunaarusiaagallartumik maanna saqqummiussipput.
Allattoq Noah Mølgaard
maajip 30-at 2011 09:48

Nalunaarummi ajutoornermut pissutaasoq suli nassuiaatissarsineqanngilaq, naak ajutoornerup kinguninngua nalunaartoqaraluartoq timmisartup assakaasuisa ikkuffii pissutaasinnaasut.

Timmisartut ajutoornerinik misissuisartut nalunaarusiaanni allaqqavoq, silarlunneranni timmisartoq missimavoq. Timmisartumi pisunik nalunaarsuisartoq boksimik qernertumik taaneqartartoq malillugu timmisartup milernerminni 11 grademik uernissaa pisariaqarsimavoq. Taamaammat timmisartup assakaasua talerperleq siulliulluni tussimavoq, assakaasullu ikkuffia kinguninngua napivoq. Tamatuma kingorna timmsartoq mittarfikkut sisoorpoq qaarsumullu unilluni.

Ulloq taanna timmisartoq alla ataasiinnaq Nuup mittarfianut missimavoq, Air Icelandilli pisortaa Arni Gunnarsson ajutoornerup kingorna naliliivoq ajutoornermut sila pissutaanngitsoq.

Nalunaarusiaq malillugu timmisartumik ingerlatitsisut marluullutik silap qanoq innera nalusimanngilaat. Ilanngullugu nalunaarutigineqarpoq timmisartoq ajoqusingaatsiarsimasoq.

Timmisartoq Dash-8 flyet Islandimi Reykyavikimiit tikittoq 31-nik ilaasoqarpoq timmisartullu inuttai pingasuullutik. Ajutoornermi annertuumik ajoqusertoqanngilaq. Ilaasunilli 31-aasunit aqqaneq marluk tuparujussuarsimanertik pissutigalugu ikiorneqarasuartariaqarsimapput misigisartik sakkortooq anisittariaqarsimagamikku.

Timmisartut ajutoornerinik misissuisartut inaarutaasumik nalunaarusiaat suli piariinngilaq misissuinerit suli ingerlanneqarmata.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk