Air Icelandimik isumaqatigiissut atorunnaarsinneqassanngilaq

Inatsisartuni Aningaasaqarnermut ataatsimiititaliami ilaasortat, Naalakkersuisut siulittaasuat Kuupik Kleist februaarip 16-iani kaammattuuteqarfigaat, Air Icelandip Namminersorlutillu Oqartussat akunnerminni isumaqatigiissutigisimasaat misissorluarneqassasoq, taamatullu aamma isumaqatigiissutip inuiaqatigiinnut qanoq kinguneqarsinnaannerata misissorneqarnissaa piumasarineqarluni.

Naalakkersuisut siulittaasuat Kuupik Kleist ullumi oqarpoq,

isumaqatigiissutip inuiaqatigiinnut sunniutigisinnaasai misissorneqassasut.

Kisianni Namminersorlutik Oqartussat Air Icelandillu timmisartuussinermut isumaqatigiissutaata ingerlaannartumik atorunnaarsinneqarnissaanut piumasaqaat akuersaanngilaa.

- Aningaasaqarnermut Ataatsimiitsitaliap piumasaqaataa arlalitsigut naalakkersuisuniit naaperiaaffigivagut, ilaatigut una Air Icelandilu isumaqatigiissut ingerlaannartumik atorunnaarsinnissaa pinngikkaluarlugu.

Qanoq akissuteqaravit?

- Aningaasaqarnermut Ataatsimiititaliap erseqqissaqquaa, Naalakkersuisunut ilaasortat akisussaaffimminnik aallussinissaanut tunngassuteqartut.

Oqaatigineqarsinnaava Aningaasaqarnermut Naalakkersuisoq Palle Christiansen, ilinniit naveersittoq?

- Isumaqatigiissusiorsimaneq pillugu, naveersittutut oqaatigineqarsinnaanngilaq.

Aningaasaqarnermut Naalakkersuisoq tunuartinneqassava?

- Naamik, Naalakkersuisut siulittaasuat Kuupik Kleist oqarpoq.

Aningaasaqarnermut Ataatsimiitsitaliami siulittaasup Naaja Nathanielsenip IA-meersup, Naalakkersuisut Siulittaasuata Kuupik Kleistip akissutaa oqaaseqarfigisinnaanngilaa, Aningaasaqarnermut Ataatsimiitsitaliami ilaasortat ataatsimoorlutik suli isummerfiginngimmassuk.

Naaja Nathanielsenili oqarpoq, Kuupik Kleistip akissutigisimasaa pillugu aningaasaqarnermut ataatsimiititaliami ilaasortat aqagu aqaguaguluunniit ataatsimiissasut.