Air Iceland isumaqatigiissuteqarfigaat
Tamanna aningaasaqarnermut Naalakkersuisumit Palle Christiansenimit uppernarsarneqarpoq.
Isumaqatigiissut Air Greenlandip angallannermut akisutitsineranut peqquteqarpoq, Air Iceland Nunatta avataaniikkaluartoq, aningaasatigut sipaarfissatsiaalaammat Namminersorlutik Oqartussat Air Iceland suleqatiginiarlugu isumaqatigiissuteqarfigaat.
- Namminersorlutik Oqartussat Air Icelandilu, angallanneq pillugu immikkut isumaqatigissuteqarput. Tassani Nuummiit Københavnimut angallannerit Air Greenland aqqutigalugu pisarsimagaluartut, maanna Air Iceland aqqutigalugu akikinnerusumik ingerlanneqalissapput, Palle Christiansen oqarpoq.
Soorliuna Namminersorlutik Oqartussat Air Icelandilu, isumaqatigiissuteqarsimasut?
- Angalanerit Air Greenlandimiit akikinnerujussuunissaasa saniatigut, maanna angalanerit eqaannerujussuarmik ingerlanneqarsinnaalerput. Soorlu angalanissamut allanngortitsisinnaanerit pisinnaalerput, tamannalu Air Greenlandimi pisinnaanngilaq, Palle Christiansen oqarpoq.
Soorliuna Air Greenland isumaqatigiissusiorfigineqarsimanngitsoq?
- Paasitinneqarpunga, Air Greenland Air Icelandilu neqeroorummik sanaqquneqarsimasut. Air Iceland neqeroorummik orniginarnerpaamik neqeroorsimavoq, taamaammat neqeroorut taanna tigusimavarput, Palle Christiansen tunngavilersuuteqarluni taama oqarpoq.
Air Iceland qanorluunniit atorneqartariaqarpa?
- Naalakkersuisoqarfiit namminneq aalajangersinnaavaat Air Greenland imaluunniit Air Iceland atorlugu angalatitsissanerlutik.
Namminersorlutik Oqartussat ukiumut aningaasarpassuit angalanerinnarnut atortarpaat, taamaammat sipaarniarnissaq pingaaruteqarpoq. Aningaasat angallannermut atorneqartussaagaluit, maanna innuttaasunut tunnerusinnaanngorput, Palle Christiansen naggasiivoq.
