Air Greenlandip timmisartuutini Norsaq iluarsereersimavaa

Timmisartoq imarpimmut Atlantikumut sapaatip akunnera kingulleq nakkarpoq, issimasullu 228-t tamarmik ajunaarsimassangatinneqarput, taamanimiillu eqqarsaatigineqarpoq, timmisartup sukkassusaanik uuttuutaasa ajoquteqarnerat pissutaalluni timmisartoq nakkarsimassasoq. Air Francep timmisartuutaaniit timmisartup ingerlaarnerani paasissutissanik katersuiffiit suli nassaarineqanngillat, ilimagineqarporli, timmisartup Brasiliap Afrikallu akornannut nakkartup, arriippallaarluni silarlummut pulaneranik pissuteqarsimasinnaasoq.

Taamaammat Air Francemi timmisartumi aquttut peqatigiiffiata ilaasortani maanna kajumissaarpai, timmisartunut aalajangersimasunut, tassa Airbusinut A330-nut aamma A340-nut aqullutik aallanngilluinnaqqullugit, timmisartut taakku sukkassusaannut uuttuutit iluarsineqartinnagit.

Air Greenlandili eqqissisaavoq. Tiimmisartuutileqatigiiffiup Airbusiutaani 330-200-mi, Norsami, sukkassutsimut uuttuutit februaarimili taarserneqareerput.

- Taama qinnuigineqaraangatta peqqussutit malittuaannarpavut, Air Greenlandimi paasissutissiisartoq, Pia Bang Christensen, Radioaviisimut ilisimatitsivoq.