Air Greenlandip timmisartuussinissat tamaasa taamaatikkai Nuummilu politiit aqqusinermi angallattoqaqqunngikkaat

Nittaallunilu anorlerpoq. Nunatsinni sumiiffiit annerpaartaanni sila ima atoruminaatsigaat allaat Air Greenlandip timmisartuussinissani tamaasa nalunaaqutaq ualimut marlunngunngitsiartoq taamaatiinnarlugit.

Air Greenlandip attaveqaqatigiinnermut pisortaa, Masaana Egede KNR-imut paasissutissiivoq.

Aasiaat-Kangerlussuaq aamma Kangerlussuaq-Aasiaat akornanni taamaallaat timmisartuussisoqassaaq.

Taamaammat timmisartumut ilaasussat 232-t angalanissaat allanngortiterneqaleruttorput.

- Silap timmisartuussisinnaatinngilaatigut, ilaasussat tamarmik angalanissaasa allanngornerannik toqqaannartumik nalunaarfigineqassapput, Masaana Egede oqarpoq.

Taassuma aqagu ullaakkut timmisartuussisinnaaleqqinnissartik naatsorsuutigaa – silali apeqqutaajumaarpoq.

Nuummi anorlernerusoq

Nuummi sila ajungaarmat bussit allaat angalanngillat. Bussit angalanerat anorlingaatsiarnera erseqqarinnginneralu pissutigalugit nalunaaqutaq 14.41 unitsinneqarput.

Kalaallit Nunaanni Politiit illoqarfiit pingaarnersaanni biilit qassiiusut aputini niffakuni nikinneq ajuleqqaffigisaanni pisariaqanngitsumik angallattoqaqqunngilaat.

- Nuummi politiit silapilunnera erseqqarinnginneralu pissutigalugit pisariaqanngitsumik angallattoqaqqunngilaat. Politiit innuttaasut biilertut mianersortumik sissuertumillu aqqusinermi angallannissaat kaammattuutigaat, politiit allapput.

DMI-mi silasiortup, Dan Nilsvallip Nuummi silapilunnerunerarpaa. Nunarpummi tamangajammi silalukkaluartoq illoqarfiit pingaarnersaanni anorlerneruvoq.

- Piffissami matumanerpiaq Nuummi anorlerneruvoq, anori 20-t missaannik 20-llu akornanni sekundimut sakkortussuseqarpoq tamatumalu saniatigut nittaalaqattaarluni, silasiortoq, Dan Nilsvall oqarpoq.