Timmisartoq nutaaq Tuukkamik taaguuteqarpoqAssi: Air Greenland

Air Greenlandip timmisartortaassaa 700 millionit koruunit sinnerlugit akilik

Atlantikoq qulaallugu timmisartussaq nutaaq ukiaru atulissaaq.

Air Greenlandip atlantikoq qulaallugu ilaasunik angallassissutissani siornaak pisiarigamiuk akia millioninik pingasunik kisitsisitaqarnerarpaa. Millionilli qanoq amerlatigineri taamani oqaatigiumaneqanngillat. Maannali kisitsisitalerneqarput.

- Timmisartoq pisiatsitut ittoq 700 millionit koruunit sinnerlugit akeqarpoq, Jacob Nitter Sørensen, timmisartuutileqatigiiffiup oqaluttuarisaanerani pisiaani akisunerpaaq pillugu, KNR-mut oqarpoq.

Taassuma timmisartoq Airbus a330-800neo nutaavik, 307-nik ilaasoqarsinnaasoq ukiaru atulissasoq naatsorsuutigaa.

Avatangiisinut mingutitsinnginneruneq

Taannali pisiarinagu allamik aamma toqqagassaqarsimagaluarpoq. Pisortap Ilulissani innuttaasunik sisamanngornermi ataatsimiititsinermi timmisartup nutaap pisiamik assinga, ukiuni tallimani atoreersimasoq, 300 millionit koruuninik, tassa pisiaannit nutaamit 400 millionit koruuninik akikinnerugaluartoq oqaatigaa.

Takornarialli piumaleraluttuinnagaat, tassa avatangiisinut mingutitsinnginnerunissaq, timmisartuutileqatigiiffiup pingaartikkamiuk nutaavimmik pisivoq.

- Takornariat pinngortitaq sermerlu aattoq takuniarlugit ilerasuuteqaratik Kalaallit Nunaannukartassappata taava uagut ornitassatut mingutitsinngitsutut nittarsaattariaqarpugut, Jacob Nitter Sørensen oqarpoq.

Timmisartoq nutaaq Tuukkamik taaguuserneqartoq, maanna atlantikoq qulaallugu timmisartuussisartumit, Norsamit procentinik 14-nik orsussamik atuinikinneruvoq, taassumalu saniatigut CO2-mik aniatitsinnginnerulluni.

Timmisartoq qulimiguullillu arfinillit

Tuukkap aningaasalersornissaa timmisartuutileqatigiiffiup qulimiguullit siornatigut pisiai arfinillit ilanngullugit ataatsimut pissaaq. Taakkua nalingisa 15-30 procentiat Air Greenlandip nammineq aningaasaatiminik akilissavaa, sinnerilu taarsigassarsiarisimallugit.

- Siorna marsimi aningaasaliissutissarsiorpugut. USA-mi inuussutissarsiortunut nioqquteqartuni 1,2 milliardit koruuninik piumasqaatitagissaartunik taarsigassarsivugut. Aningaasat taakkua Tuukkamut qulimiguulinnullu nutaanut akiliutigaagut, Jacob Nitter Sørensen oqarpoq.

Air Greenlandip Norsaq aappaagu marsip aallaqaataata tungaanut tungaanut pigissavaa. Taassumalu kingorna tunissallugu.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl