Air Greenlandip sullissilernissaa tunumi narrugaat
Illoqqortoormiunut tassanngaanillu timmisartuussisarnerit Air Greenland-imit isumagineqalerpata silap ajornera pissutigalugu taamatitsisarnerit akulikillinissaat Susanne Pikep aarleqqutigaa.
Air Greenland-ip kiffartuussinermik isumaqatigiissutaa naapertorlugu, Nerlerit Inaannut timmisartuussisarnerit pisalissapput, Kangerlussuarmiit Nerlerit Inaat aqqusaarlugu Island-imut Keflavik-imut timmisartuussisoqartalluni. Aamma Ilulissanit Kangerlussuaq aqqusaarlugu Nerlerit inaannut timmissartuussisoqartalissaaq tassanngaanniillu Kangerlussuaq aqqusaarlugu Nuummut timmisartuussisoqartassaaq.
- Illoqqortoormiumiut aamma nuanit allanit Illoqqortoormiunut angalaniartut sivisunerusumik angalasalissapput, tamannalu ajorluinnarpoq, Illoqqortoormiuni takoriartitsivimmmi Nanu Travel-imi pisortaq Susanne Pike oqarpoq.
Illoqqortoorminut tassanngaaniillu silaannakkut angalasut Island-imiut timmisartuutileqatigiivinit Air Iceland-imit timmisartuunneqartarput, sapaatip akunneranut marloriarluni Nerlerit inaannut timmisartumik attaveqartarmat.
Air Greenland timmisartuussisalerpat Illoqqortoormiunut angalaneq Kangerlussuaq aqqusaarlugu akisunerulissaaq pisariunerulerlunilu, Susanne Pike oqarpoq.
- Timmisartuussisarnerup allanngortinneqarnissaa tusaamaneqalermalli Illoqqortoormiuni innutaasunit tamanit iluarineqanngilaq. Ukiut 15-it matuma siornatigut Air Greenland misiligummmik Kangerlussuarmit Nerlerit inaannut timmisartuussisarpoq, taannalu iluatsinngilaq - tassami qaammatit ikittuinnaat ukiullu affaa naanngitsoq unitsinneqarpoq, Susanne Pike oqarpoq.
Sullissinissamut isumaqatigiissut atuutilerpat takornariat Illoqqortoormiunut angalasut sivisunerusumik akisunerusumillu angalasalissapput. Takornariat Illoqqortoormiunukarniartut marloriarlutik sermersuaq qulaattussaassavaat, Susanne Pike oqarpoq.
Sullissinissamut isumaqatigiissut Tasiilami takornariartitsivimmut Destination East-imut ajortumik kinguneqassaaq. Timmisartuutileqatigiit Air Iceland aasaanerani arfinileriarlutik Kulusummut timmisartuussisarput. Ukiup sinnerani pingasoriarlutik marloriarlutik Kulusummut timmisartuussisarlutik.
Air Iceland ukiuni kingullerni arfineq marlunni Nerlerit inaannut Kulusummullu timmisartuussisarpoq.
Namminersorlutik Oqartussat sullissinissamik Air Greenland-imik isumaqatigiissutaat, Inatsisartut aningaasaqarnermut ataatsimiititaliaanit akuersissutigineqarpoq.
