Air Greenlandip Pituffimmik kiffartuussinera ingerlaannassaaq
- Ukiuni kingullerni qulingiluani affarmilu US Air Forcemut isumaqatigiissuteqarsimavugut, amerikamiullu ingerlatseqatigiiffinnik allanik unammilleqateqarnitsinni toqqaqqissimammatigut, tamanna soorunami kiffartuussinitta naammagisimaarneqarneranut takussutissaavoq. Suliassamik siusinnerusukkut ingerlatsisimaneq nalilersuinermi tunngavigineqartunut ilagitinneqarpiarpoq, tassanilu angusarissaarnerpaavugut, tamatumanilu sulisuvut pikkorissut sungiussisimasullu, timmisartuussinernut taakkununnga suleqataasimasut annertuumik nersualaartariaqarput, Air Greenlandip pisortaanera Michael Højgaard oqarpoq.
US Air Forc-mut isumaqatigiissuteqarnerup kingunerisaanik Air Greenland timmisartuni Airbus atorlugu sapaatit akunneri sisamakkaarlugit Thule Air Basep aamma Københavnip akornanni timmisartuussisassaaq, tamatumalu saniatigut DASH 8 atorlugu sapaatit akunneri allortarlugit sakkutooqarfiup aamma Kangerlussuup akornanni timmisartuussisassalluni. Taakku saniatigut Københavnip aamma Kangerlussuup akornanni timmisartuussinernut allanut bilitsit aalajangersimasunik amerlassusillit kiisalu usit ilaannik assartuussisoqartassaaq.
-Isumaqatigiissummi piumasaqaatit ineriartortinneqartuarput, matumanilu ilaatigut IT-p isumannaassusianut, qaffasissorujussuarmik inissisimasumut piumasaqaatit sakkortuut naammassisinnaasimavavut, Air Greenlandimi pisortaaneq Michael Højgaard ilisimatitsivoq.
Isumaqatigiissut nutaaq oktobarip ulluisa 30-iat 2018 ilanngullugu atuutissaaq.
