Air Greenlandip Kunuunnguaq tunivaa

Boeingip tuniniarneqarnera iluatsittoq Air Greenlandip ataatsimeersuartitsinerani tusarliunneqarpoq. Pisortaanerulli Michael Binzerip kimut qanorlu akilerlugu tunineqarsimanersoq oqaatigerusunngilaa. Timmisartorsuarli siunissami ilaasunik timmisartuussisassanngitsoq paasinarsivoq – assartuutinngortinneqassagamimi.

Timmisartumik allamik attartuinissaq pilersaarutaavoq, Narsarsuup Københavnillu akornanni aasaanerani timmisartumik taassuminnga timmisartuussisoqartarnissaa siunniunneqarluni.

Københavnimut utimullu juunimi, juulimi aggustimilu timmisartuussisoqartassaaq, timmisartut pisiarineqaqqammersut Dash-8-200-t ukiup sinnerani atorneqassallutik.

Timmisartut taakku Narsarsuup Kangerlussuullu akornanni timmisartuussisassapput, Nuuk aqqusaartassallugu.

Angallannermut Naalakkersuisup Jens B. Frederiksenip ukiumut nalunaarummut atatillugu oqaaseqaateqarnermini Kujataani timmisartuussinerup pitsaanerpaatinniarneqarnissaa Naalakkersuisut kissaatigigaat erseqqissarpaa.