Air Greenlandip Kujataani kiffartuussinera isornartorsiorneqarpoq

Kujataani timmisartumik angalasut ukiuunerani Danmarkiliarniaraangamik Kangerlussuakkoortalernissaat, Air Greenlandip qaammatip ataatsip matuma siornatigut nalunaarutigaa, aqqutip ukiuni kingullerni amigartoorfiusarnera pissutaatinneqarluni.

- Kommune kujallermi angallannermut ataatsimiititaliap naammagittaalliuuteqarnermini timmisartortitseqatigiiffiup Air Greenlandip kujataani kiffartuussinissaa, innuttaasunut, suliffeqarfinnut, atuarfinnut inuussutissarsiuteqartunullu tamanut eqquisussaasoq erseqqisarpaa.

Kommunimi suliffeqarfinnik pilersitsinissanut ineriartortitsinissaq aserorluinnarneqassaaq, angallannermut ataatsimiititaliap siulittaasua Kaj Egede allappoq.

Tamanna tunuliaqutaralugu, Kommune Kujallermi Angallannermut ataatsimiititaliaq periarfissaasinnaasunik allanik ujartuinissamik piareersimavoq, Islandillu suleqatigineqarsinnaanissaa ilaatigut taaneqarluni:

- Taamaattumik pisariaqartinneqarpoq maani Kujataani ataatsimoorluta angallannermut aaqqissuussinermik pilersitsinissarput nunap immikkoortuanut tamarmut iluaqutaasussamik, qulakkiissallugulu ukioq kaajallallugu toqqaannartumik Atlantiku qulaallugu attaveqarnissaq, kommune kujallermi ataatsimiititaliaq allappoq.

Ataatsimiititaliami isumaqatigiissutigineqarpoq angallannikkut aaqqissuussinerup ataqatigiissuunissaa, timmisartukkut angallanneq, immakkut angallanneq nioqqutissanillu assartuineq ilanngullugit.