Air Greenlandip GIF-illu suleqatigiinnertik aallarteqqippaat

Isumaqatigiissummi anguniagaavoq Kalaallit Nuaanni timersortartut, sungiusaasut, timersoqatigiinnut assigiinngitsunut aqutsisut kiisalu dommerit, unamminissanut pikkorissarnissanut il.il. angalasussat, Air Greenlandimit tapiiffiginnittarnikkut taperserneqarlutillu ineriartornissaannut iluaqutsiinissaq.

Air Greenlandip Timersoqatigiit Kattuffiatalu isumaqatigiissutaanni pingaartitat sisamaapput, tassalu timersorneq pinnguarnerlu, meeqqat inuusuttullu, ilinniagaqarneq ineriartornerlu kiisalu nunap immikkoortuini ineriartortitsineq. Taamaaliornikkut nunatsinni timersorneq assigiinngisitaaqisoq tamakkerniarneqarpoq. Tamannalu pioreersunut aammalu aaqqissuussaavallaanngitsunullu atuuppoq.

-Siunniussat anguniagassallu nutaat pilersitagut makkunannga tunngaveqarput: angusat pitsaasut, naleqartitat peqqinnartut kiisalu ataatsimoorneq nukittooq. Suliutit nutaat timersornerup iluani kajumissutsiminnik suleqataasunut pitsaanernik piginnaasaqalersitsissapput, nunatsinnilu pissartanngorniunnerni aaqqissuussisarnerit ajornannginnerulissallutik. Suliassarlu taanna isumaqatigiissuteqarneq aqqutigalugu piviusunngorsinnaalerpoq, taamaattumik Air Greenlandilu isumaqatigiissusioqqissinnaanerput nuannaarutigaarput, GIF-ip siulersuisuinut ilaasortaq Ole Kielmann Hansen oqaluttuarpoq.

Nunatsinni timersorneq isumaqatigiissutip atuunnerani 1.500.000 kr.-inik aningaasalersorneqassaaq. Piffissamilu tassani Air Greenland kingumut nunatsinni timersornermut aningaasaliisartut pingaarnersarileqqissavaat.

- Isumaqarpugut inuiaqatigiinni sapinngisamik amerlanerpaat timersuummik nuannarisaminnik ingerlatsisinnaanissaannut peqataanissaq pingaartuusoq. Taamaammat sungiusaasut pikkorissarnissaannut aamma aqutsisut ineriartortinnissaannut peqataaniarluta tapersiivugut, neriuutigigatsigu taamatut iliornitsigut timersortartut amerlanerpaat iluaquserneqarnissaannut peqataassalluta, Christian Keldsen, Air Greenlandimi niuernermut pisortaq oqarpoq.