Air Greenlandimi sulisut 45-t soraarsinneqassasut
Ukioq nutaaq aallartippat Disko Line A/S kujataani ilaasunik angallassinermik isumaginnittunngussaaq. Imaatigut silaannakkullu angallassinerit kujataani ataatsikkut ingerlanneqaleqqissapput. Kiffartuussineq eqaannerusoq akikinnerusorlu kujataamiunut neriorsuutigineqarput. Kujataanilu heliportini sulisunik soraarsitsinissaq Air Greenland-imiit avaqqunneqarsinnaanngilaq.
- Kujataani silaannakkut immakkullu ataatsikkut angallassisoqalertussanngornera Air Greenlandip heliportinik matusineranik sulisunillu soraarsitsiortorneranik kinguneqassaaq.
- Nunarput tamaat isigalugu heliportini sulisut 45-it soraarsinneqartariaqassapput, Air Greenland-ip pisortaanera Michael Højgaard KNR-mut oqarpoq.
Kujataanilu heliportini sulisut massakkut 14-iusut akornanni qassit soraarsinneqassanersut massakkut oqaatigineqarsinnaangikkallarpoq.
Aamma atuaruk Tunumi innuttaasut angalanissamut periarfissaqarnerulissasut
Disko line-p kujataani angallassileruni qanoq amerlatigisunik sulisoqarnissaq, qanorlu tamakkua aaqqissuunneqassanersut aamma massakkut oqaatigineqarsinnaangilaq.
-Tassa Air Greenland qanimut suleqatigisussaavarput. Aamma oqaloqatiginnerit aallartissapput ulluni qaninnerni. Taava takutissavaa qanorpiaq ingerlaqqissanersugut. Kisianni uani siusippallaarpoq erseqqissumik tamakkua oqaaseqarfiginissai, Frederik Sandgreen Disko Linemi pisortaq KNR-imut oqarpoq.
