Air Greenlandimi saqisut sulisartoqarnermut eqqartuussivimmut

Air Greenlandimi timmisatuini saqisut aqagu ullakkut suliartunngippata, taava Air Greenlandip sulisartoqarnermut eqqartuussivimmut nalunaaqutaq qulinut suliassanngortinniarpai, Air Greenlandip pisortaa, Michael Binzer, Radioaviisimut taama oqarpoq.

Air Greenlandip pisortaa, Michael Binzer, isumaqarpoq maannakkuugallartoq saqisut kiisalu Air Greenlandimi sulisitsisuusut akornanni allanik isumaqatiginninniutaasinnaasunik periarfissaaruttoq, taamaattumillu timisartunik saqisunik naapitsiumanngikkallarsimalluni.

- Timisartumi saqisut sulinerminnik unitsitsinerannut tunngatillugu isumaqarpugut tamanna unioqqutitsinerusoq, tamanna ersarippoq, taamaammallu naliliivugut timmisartumi saqisut suliartoqqinnissaasa tungaanut oqaloqatigeqqinniaratigik, taama oqarpoq, Michael Binzer.

Air Greenlandimi timmisartumi saqisut ippassarli ullakkut suliaminnik unitsitsipput, suliatillu pillugit ataatsimeeqatigiilerlutik. Suliaminnik unitsitsinerannut pissutaasoq tassaavoq, qaammatini arfineq pingasuni Air Greenlandip aqutsisoqarfianut isumaqatiginninniartarsimagaluarmata ilaatigut ”tarnikkut sulinerminni avatangiisitik” nanertorneqaatigisarsimagamikkik, sulinerminni- kiisalu qasuersaartinneqarnissamik malittarisassat unioqqutinneqartuartarsimammata aammalu ilanngaatissat ilanngaatigereerlugit akissaatit appartinneqarsimammata.