Air Greenlandimi saqisut suliatik unitsippaat
Timmisartuutileqatigiiffimmi Air Greenlandimi saqisut sulinerminnut atatillugu ullaaq manna ataatsimiipput, suliatik unitsillugit, taamaammat Danmarkip Kalaallit Nunaatalu akornanni ullaaq manna timmisartuussisoqassanngilaq. Nutaarsiassaqartitsivik Ritzau taanma ilisimatitsivoq.
aggustip 28-at 2007 05:15
Saqisut aningaasarsiatik sulinertillu naammaginngilaat, Air Greenlandimi saqisut kattuffianni siulittaasoq, Anders Mark Jensen, nutaarsiassaqartitsivimmut Ritzauimut oqarpoq.
Nangipporlu:
-Sulisut pisortanut allagaqareerput, naammaginartumilli akissutisinatik. Qaammatit arfineq-pingasut kingulliit isumaqatigiinniartaraluarput, maannalu naammagittarunnaavipput, Anders Mark Jensen oqarpoq.
Air Greenland tusagassiutinut ullaaq manna allappoq, Københavnip Kangerlussuullu akornanni timmisartuussinissat nalunaaquttap akunnerinik tallimanik kinguartinneqarallartut. Kisianni Københavnimiit Narsarsuup tungaanut aqqut eqqorneqassanngilaq.
Nunatsinnili timmisartuussinerit eqqorneqartussaasut Air Greenland nalunaarpoq.
