Air Greenland unammillerniarneqalerpoq
Arctic Travel Group-ip Arctic Umiaq Line pisiarissagunikku nunatta Danmarkillu akornanni timmisartuussisalernissaq pilersaarutigaat.
Narsarsuarmut Kangerlussuarmullu Danmarkimiit timmisartuussisalerniarpugut, taamatut oqarpoq Topas Adventure Travelimi pisortaq Jørgen Nielsen.
Topas Adventure Travel siusinnerusukkut oqaatigeriikkatsitulli Arctic Travel Groupimik piginneqataapput.
Tassalu piginneqatigiit taakkua Arctic Umiaq Linemik pisiarinnikkusullutik misissuileruttorput.
Suliffeqarfiit taakkua sisamat tamarmik nunatsinni takornarianik sullissisooreerput.
Arctic Umiaq Line pisiarissagunikku umiarsuarminnut ilaasussatik nammineerlutik atlantiku qulaallugu timmisartuukkusuppaat.
Arctic Umiaq Linemik ukiuni arlalinni suleqateqarsimanerput ingerlateqqikkusupparput, nunaqavissut takornariallu akulerullugit angallattarlugit. Aamma timmisartukkut umiarsuakkullu angalanerit ataatsimik bilitseqarluni aaqqissugaasartut atorluarneqarnikuusut aallarteqqikkusuppagut.
Narsarsuarmiit aamma taamaaliortoqarsinnaanngortillugu.
Jørgen Nielsenip anguniagarinerarpaattaaq akit unamminartut atorlugit nunaqavissut angallavinnut pilersaarutigisaminnut ilaasorineqartarnissaat.
Angalanerit sumut ingerlasassanersut qanorlu akeqassanersut oktoberi qiteqqutsinnagu oqaatigineqarsinnaanngitsut Jørgen Nielsen oqarpoq
