Air Greenland sullissinissamut isumaqatigiissusiorfigineqarpoq
Naalakkersuisut aalajangiuppaat kiffartuussinissamik isumaqatigiissut maannakkut atuuttoq sivitsorneqaannassasoq taamaattoq allannguuteqalaarluni.
Qeqertarsuup Tunuani innuttaasut kissaateqarnerat naammassiniarlugu, ukiuunerani angallassineq allanngussaaq. Air Greenland novembarip ulluisa aallaqqaataaniit maajip ulluisa aallaqqaataanut timmisartuussisalissaaq, decembarip ulluisa aallaqqaataaniit maajip ulluisa 15-iat ilanngullugu timmisartuussisarunnaarluni.
Qeqertarsuup Tunuani qulimiguulik Bell 212 atorlugu aamma timmisartuussisoqartalissaaq. S61 tamaani atorunnaarlugu.
Kalaallit Nunaata kujataani angallassinermi qulimiguullit Bell 212-it marluk atorneqartalissapput, S-61 taqqavani atorneqarunnaartussaammataaq.
Kalaallit Nunaata qeqqani imaatigut angallassineq maannakkutut atorneqartoq ingerlaannassaaq. Kisiannili Namminersorlutik Oqartussat Royal Arctic Bygdeservicemut tamanna pillugu isumaqatigiissusiussanngillat, Arctic Umiaq Line isumaqatigiissusiorfigineqarmat.
Tunumi, Air Iceland atorunnaarlugu, Namminersorlutik Oqartussat Air Greenlandimut kiffartuunneqarnissamik isumaqatigiissuteqarput. Tunumiit Kalaallit Nunaata kitaanut pitsaanerusumik attaveqalernissaq ullumikkornit pitsaanerujussuarmik ataqatigiissilerneqassalluni.
- Innuttaasunik kiffartuussinissap siunissami ullumikkutut iinnarnissaa Naalakkersuisunit pingaartinneqarpoq. Taamaassaarlumi. Inatsisartuni ataatsimiititaliat angallannermut attuumassuteqartut, aamma Akileraartarnermut Aningaasaqarnermullu Ataatsimiititaliaq, Kalaallit Nunaanni angallannikkut attaveqaatit siunissaat pillugu pilersitsiviulluartumik oqaloqatiginissaannut qilanaarpunga, Ineqarnermut, Attaveqarnermut Angallannermullu Naalakkersuisoq, Jens B. Frederiksen oqarpoq.
