Air Greenland: Sulisartut højskoleat akikitsunik ujarlersinnaavoq
Sulisartut højskoleata pisortaata Kaj Lyberthip Air Greenland isornartorsiorpaa, angalaqatigiinnut akigitinneqartut qaffasippallaarnerat pillugu.
Angalatitseqatigiiffiit ukiut kingulliit marluk timmisartortitseqatigiiffimmit Air Greenlandimit periarfisinneqarnikuupput, angalaqatigiit ulluni aalajangersimasuni timmisartumik angalasinnaanissannik, tamatumalu kingorna Air Greenland akinik neqerooruteqartarluni. Ukiup qanoq ilinerani ullullu suut angalaffiginiarneqarsut apeqqutaatillugit neqerooruteqartoqartarluni.
Air Greenland angalaniartunut akinik assigiinngitsunik pingasunik akeqartitsisarpoq, tassalu akit angalaffigineqarpallaanngitsuni akigitinneqartut, akit timmisartumik angallaffigineqarnerpaasuni akigitinneqartartut taamatullu piffissami akunnannerusumik angalaffigineqartuni akit.
Christian Keldsenip erseqqissarpaa, angalatitseqatigiit
angalanissanut ullunik aallarfissanik allanngortitsinissaminnut periarfissinneqartartut, taamaalillutik akikinnerusunik angalatitsisinaaniassammata.
Kaj Lyberth Sulisartut Højskoleani pisortaq isornartorsiulluni oqarpoq, angalaqatigiit Air Greenlandimut ilaaniartut inummut ataatsimut 13.000 koruuninik akeqartitsinera akisugalugu.
13.000 koruuninik akeqartitsineq Christian Keldsenip paasisinnaannginnerarpaa, oqarluni angalatitseqatigiiffiup kiffartuussinerminut akigititani ilanngussimassagai Air Greenland-ip akigititaasa akisunerit qaavatigut. Christian Keldsenilli ilumoorneraarpaa, piffissami timmisartukkut angallaffiunerpaasumi, timmisartuni ilaasoqarluartillugu akit qaffasissut akitiginneqartartut.
Angalatitseqatigiiffiit nammineq kiffartuussinerminni akit ilanngukkunikkit timmisartumut ilaanermut aki qaffasissaaq, taamalillunilu sulisartut højskole-ata kiffartuussinermut akit ilanngussimagunigit timmisartumut ilaanermit aki qaffasissaaq, taakkuami kiffartuussinerminni aamma nammineq iluanaaruteqarusussagamik, timmisartortitseqatigiiffiup Air Greenlandip tuniniaanermut pisortaa Christian Keldsen oqarpoq.
Narsarsuup Københavnillu akornanni timmisartuussisarneq timmmisartortitseqatigiiffimmut Air Greenland-imut amigartoorutaasarpoq. Taamaattoq Air Greenlandip pisussaaffittut isigalugu januaarip, februaarip marsillu qaammataani - piffissami tassani tunisaqarpallaartanngikkaluarlutik- Narsarsuup Københavnillu akornanni timmisartuussisarpoq.
